Behruz Karimov: «Maqsadim — etarlicha tajriba to'plab, Evropa klublari va milliy terma jamoamizning eng muhim o'yinchilaridan biri bo'lish»

Behruz Karimov mavsumning eng yorqin kashfiyotlaridan biriga aylandi va qisqa vaqt ichida «Surxon»ning yosh iste'dodi muxlislar sevimlisiga aylanishga ulgurdi. Hozirda Behruz U23 terma jamoasi ixtiyorida bo'lishiga qaramay, mashg'ulotlardan bo'sh vaqtida klub matbuot xizmati uchun intervyu berdi.

— Behruzjon, futboldagi ilk qadamlaringiz qanday bo'lgan?
— Futbol menga bolalikdan juda yoqardi. 6 yoshimdan futbol bilan shug'ullana boshlaganman. Birinchi murabbiyim Mamatov Shodmonxon, keyinchalik Namangan futbol akademyasida bo'lganman va u erda menga Bozorov Rahimjon, O'tkirbek Ergashev va Muslim Saitboev kabi malakali murabbiylar yordam berishdi. Keyinchalik Odil Ahmedov akademiyasida futbolning barcha asoslarini o'rgandim va professional futbol uchun zarur bo'lgan ko'nikmalarga ega bo'ldim. Vaqt o'tib «Surxon»ga keldim va tanlovimdan aslo afsuslanmayman.

— Behruz, o'tgan mavsumda siz Superliganing eng yorqin kashfiyotlaridan biriga aylandingiz va yoshingizga nisbatan juda etuk o'yin namoyish etdingiz. Ushbu mavsum sizda qanday taassurot qoldirdi?
— Bu mavsum men uchun juda esda qolarli bo'ldi. Professional futbolda qanday qiyinchiliklar borligini to'liq ko'rdim va biz mavsumni haqiqiy oila bo'lib o'tkazdik.

— Qisqa vaqt ichida jamoaning asosiy futbolchisiga aylandingiz va 3ta gol urdingiz. "Andijon" darvozasiga kiritilgan ikkita chiroyli gol hamda safarda «Neftchi»ga urilgan gol. Ushbu gollarni izohlab bersangiz?

— Bu gollar menga yanada xotirjamlik berdi. Birinchi golimni urgandan so'ng o'zimga bo'lgan ishonchim ancha oshdi va so'nggi turlarda jamoamizga yordam bera olganimdan juda xursandman.

— Sizningcha, qaysi jihatlar ustida yana ko'proq ishlashingiz kerak, qaysi tomonlaringiz esa eng kuchli?
— Menimcha, hozircha hammasi yaxshi ketmoqda. Asosiysi — bo'shashmasdan, bor kuchim bilan mehnat qilib, tajriba to'plashni xohlayman.

— Jamoamiz sizning rivojlanishingizga yordam beryaptimi? «Surxon»ning o'yin uslubiga moslashish qanchalik tez kechdi?
— Albatta, "Surxon" jamoasida o'zimda juda katta rivojlanishni his qildim. Buning uchun murabbiylarimiz shtabiga — Stanislav Petrovich Kudryashov hamda Fevzi Rizaevich Davletovga katta rahmat aytaman. "Surxon"ga moslashishim juda tez bo'ldi, chunki bu erda ilk o'yinlarimdanoq menga ham maydonda, ham maydondan tashqarida etarlicha qo'llab-quvvatlash bo'ldi.

— Jamoada kimlar sizga eng yaqin do'st bo'lib qoldi? Kim bilan ko'proq muloqot qilasiz?
— Tarkibimiz yosh bo'lgani sababli, moslashuv jarayoni men uchun juda tez kechdi. Deyarli barcha jamoadoshlarim bilan iliq munosabatdaman. Kamron Yusupov, Behruz Shukurullaev, Sunnattullo Hamidjonov, shuningdek jamoani tark etgan Poyonov va Turdimurodov bilan do'stona aloqalarimiz juda yaxshi. Umuman olganda, jamoamizda juda yaxshi va ahil muhit hukm surmoqda.

— "Surxon"ga kelishingiz jamoaning o'z ona shahri — Termizga qaytishi bilan bir paytga to'g'ri keldi. Shahar, muxlislar va stadion sizda qanday taassurot qoldirdi?
— Biz muxlislar tomonidan etarlicha qo'llab-quvvatlashni his qildik. Buning uchun fan-klub rahbari «Dadosh»ga alohida rahmat aytaman. Fan-klub tomonidan ko'rsatilgan qo'llab-quvvatlash aql bovar qilmas darajada bo'ldi!

Umuman olganda, Termiz shahri menga juda yoqdi. Odamlari mehribon, tribunadagi muhit juda a'lo. Stadionning o'zi esa yaxshi infratuzilmaga ega. E'tibor bergan bo'lsangiz, butun mavsum davomida stadionimizdagi maysa ideal holatda bo'ldi va hatto sovuq ob-havoda ham jamoamiz yaxshi sharoitlarda hujumkor futbol namoyish eta oldi.

— O'zingiz oldingizga kelasi mavsum uchun qanday shaxsiy maqsadlarni qo'ygansiz?
— Etarlicha tajriba to'plab, Evropa klublari va milliy terma jamoamizning eng muhim o'yinchilaridan biri bo'lish. Lekin bularning barchasiga erishish uchun men «Surxon»da o'zimni yaxshi tomondan ko'rsatishim kerak

— Hozirda siz yaqin orada Osiyo kubogida ishtirok etadigan U23 terma jamoasi yig'inidasiz. Guruhdagi raqiblaringiz Livan, Eron va Koreya bo'ladi. Turnir oldidagi vazifalar borasida savol yo'q — Vatan sharafini himoya qilish doimo eng yuqori maqsadlarni qo'yishni anglatadi. Ammo guruh bosqichidagi raqiblar kuchini qanday baholaysiz? Juda qiyin bo'lmaydimi?
— U23 Osiyo Kubogi musobaqasiga U21 jamoasi bilan kelganmiz guruhdagi raqiblarimiz azaldan kuchli raqiblarimizdan hisoblanadi. Maqsadimiz — bu musobaqada munosib ishtirok etib Vatanimizni xursand qilish.

Kichik blits-savollar:

— Sevimli taomingiz?
— Oshpazimiz Nasim aka Mirzabdullaev tomonidan tayyorlanadigan barcha ovqatlar.

— Sevimli avtomobil brendingiz?
— BMW.

— Sevimli futbolchilaringiz top-3?
— Ashraf Hakimiy, Serxio Ramos, Abduqodir Husanov.

— "Surxon"da kiyinish xonasidagi etakchi kim?
— Jamaliddin Xodjaniyazov, Behzod Shamsiev, Nodirxon Ne'matxonov.

— Jamoaning eng quvnoq futbolchisi kim?
— Dilshod Yo'ldoshev, Nodirxon Ne'matxonov.

Manba: https://t.me/FCSURXON_OFFICIAL