Ole-Gunnar Sulsher: «Gol o'tkazib yubormayotganimiz — muhim jihat»

«Manchester Yunayted» bosh murabbiyi Ole-Gunnar Sulsher Evropa ligasining 1/16 final bosqichida bo'lib o'tgan «Bryugge»ga qarshi javob o'yini (5:0) borasida o'z fikrini bildirib o'tdi.

«Meni ko'proq biz qanday futbol namoyish qilganimiz xursand qildi. O'yinni yaxshi boshladik, yaxshi tempda o'ynadik va bir nechta ajoyib gollar urdik.

Igalo keskin o'ynay oladi, shuningdek, raqib darvozasiga teskari turgan holda ham harakat qila oladi. Uning goli — undan nima kutish mumkinligiga yaxshi misol. Odion to'pni ushlab turishi mumkin, bizga shu xislat etishmayotgan edi.

Agar bugun Igalo maydonga tushmaganida Grinvud o'ynashiga to'g'ri kelardi. Yakshanba kuni esa bizni yana bir o'yin kutib turibdi. Bu holda futbolchi charchab qolardi. Igalo bilan shartnoma imzolab undan qanday foydalanishni bilardik.

Biz gol o'tkazib yubormayapmiz ("MYu" so'nggi 7ta o'yinda bitta gol o'tkazdi). Bu muhim. Bugun o'zimiz istagandek o'ynadik. Futbolchilarning yuzida tabassum paydo bo'ldi va o'zlariga ishongan holda harakat qilishdi. Yangi o'yinchilar bizga bunday holatni taqdim etishdi», – dedi Sulsher.