«Sho'rtan» stadioni qorga burkangani sababli nazorat o'yini qoldirildi

Kecha – 27 fevral kuni “Sho'rtan” va “Sherdor” (Samarqand) jamoalari o'rtasida sinov-nazorat uchrashuvi bo'lib o'tishi rejalashtirilgan edi.

Ammo G'uzorda kuchli qor yog'ishi munosabati bilan tomonlarning o'zaro kelishuviga ko'ra mazkur uchrashuv qoldirildi. Bu haqda klub matbuot xizmati xabar qildi.

Shunday bo'lishiga qaramay Asror Aliqulov boshchiligidagi “Oq bo'rilar” jamoasi futbolchilari vaqtdan unumli foydalanish maqsadida qorli maydonda bo'lsa-da, mashg'ulot o'tkazib olishdi.

Eslatib o'tamiz, kecha “Sho'rtan” bilan sinov-nazorat uchrashuvini o'tkazish uchun G'uzorga birinchi Liga vakili – “Sherdor” tashrif buyurishi, mazkur uchrashuv G'uzordagi “Markaziy” stadionda soat 14:00 da boshlanishi belgilangan edi. Uchrashuvning endi qachon o'tkazilishi hali ma'lum emas.