Ispaniyada "Real"ning bo'lajak o'yin uchun taxminiy tarkibi ma'lum qilindi

Madridning "Real" klubi yakshanba kuni La Liga 19-turi doirasida o'z maydonida "Betis"ga qarshi bahs olib boradi.

Uchrashuv Toshkent vaqti bilan 20:15 da boshlanadi. "Qaymoqranglilar" ustozi Xabi Alonso ushbu bahsda jamoa va chempionat to'purari Kilian Mbappega umid bog'lay olmaydi. Diario AS xabariga ko'ra, madridliklar hujum chizig'ida Vinisius Junior va Rodrigo tandemi harakat qiladi. O'rta chiziqda Arda Gyuler, Orelen Tchuameni, Eduardo Kamavinga va Jud Bellingem, himoyada Federiko Valverde, Raul Asensio, Antonio Ryudiger va Alvaro Karreras harakat qiladi. Darvozani odatdagidek Tibo Kurtua egallaydi.

"Real" g'alaba qozonsa, "Barselona" bilan oradagi farqni yana 4 ochkoga qisqartiradi. Shanba kuni "ko'k-anorranglilar" safarda "Espanol"ni mag'lub etishdi (2:0).