Flik Ispaniya Superkubogining "Barselona" uchun ahamiyati haqida gapirdi

"Barselona" bosh murabbiyi Xans-Diter Flik Saudiya Arabistonida bo'lib o'tadigan Ispaniya Superkubogi haqidagi savolga javob berdi.

7 yanvar, chorshanba kuni kataloniyaliklar yarim finalda Bilbaoning "Atletik" klubiga qarshi maydonga tushadi. Ikkinchi finalchi esa bir kun o'tib Madridning "Atletiko" va "Real" jamoalari o'rtasidagi bahsda aniqlanadi.

"Superkubokni yutish - bizning maqsadimiz. Ammo avval juda qiyin raqib bo'lgan "Atletik" bilan o'ynashimiz kerak. U yog'ini ko'ramiz. Ertaga bizda dam olish kuni bor, indinga biz mashq qilamiz va Saudiya Arabistoniga uchamiz," - deya Flikning so'zlarini keltiradi Managing Barca.

Ispaniya Superkubogi finali 11 yanvar kuni bo'lib o'tadi. "Barselona" musobaqaning amaldagi g'olibi hisoblanadi.