"Espanol" muxlislari Joan Garsiyaga "sovg'a" tayyorlashmoqda

"Espanol" ultras muxlislar guruhi bugun, 3 yanvar kuni bo'lib o'tadigan "Barselona"ga qarshi o'yin oldidan aktsiya o'tkazishni rejalashtirmoqda.

Muxlislar jamoaning sobiq darvozaboni Joan Garsiyaning asosiy raqibi safiga o'tib ketganiga noroziligini maydonga kalamush tashlash orqali ifodalashni niyat qilishgan. The Athletic nashri xabariga ko'ra, bunday aktsiya muxlislar nazarida xoinga aylangan Garsiyaga qarshi norozilik ramzi bo'lishi kerak.

Ma'lum qilinishicha, ultraslar taxminan bir oydan beri bu provokatsiya uchun kalamushlarni qaerdan topish mumkinligini izlashmoqda. Stadion ma'muriyati va xavfsizlik xizmati o'yin paytida yuz berishi mumkin bo'lgan voqealarga tayyorgarlik ko'rmoqda. "Espanol" muxlislari sobiq darvozabonlarining endi "Barselona"da o'ynayotganini qabul qila olmayapti.

2025 yil iyun oyida Joan Garsia "Espanol"dan "Barselona"ga o'tdi va 2031 yilgacha shartnoma imzoladi.