"Real" va APL grandlari da'vogarlik qilayotgan Uortonning narxi ma'lum bo'ldi

"Kristal Pelas" yarim himoyachisi Adam Uorton Evropa grandlari nishonida qolmoqda.

"Burgutlar" rahbariyati 21 yoshli futbolchiga qiziqish ortib borayotganini eshitgan, shuning uchun u bilan shartnomani uzaytirmoqchi, deb yozadi jurnalist Ben Jeykobs.

Shu bilan birga, manba aniqlik kiritishicha, tomonlar o'rtasida "jentelmencha kelishuv" mavjud: agar futbolchi yangi kelishuvni imzolamasa, klub Chempionlar Ligasi ishtirokchilaridan biridan 60-65 million funt (68-75 million evro) miqdorida taklif tushganda uning transferiga to'sqinlik qilmaydi.

Adam Uortonga da'vogarlar qatorida ko'pincha "Real", "Manchester Yunayted", "Chelsi" va "Tottenxem" klublari tilga olinadi. Transfermarkt saytidagi xavbekning narxi - 60 mln evro.