Allegri Fyullkrugning "Milan"dagi debyutiga baho berdi

"Milan" bosh murabbiyi Massimiliano Allegri jamoadagi debyutini nishonlagan hujumchi Niklas Fyullkrugning o'yini haqida gapirdi.

2 yanvar kuni "rossonerilar" "Vest Xem"dan ijaraga olingan 32 yoshli futbolchini yangi futbolchi sifatida tanishtirdi va shu kuni hujumchining debyuti bo'lib o'tdi. Germaniyalik futbolchi A Seriya doirasida "Kalyari"ga qarshi kechgan va kichik hisobdagi g'alaba bilan yakunlangan o'yinning 69-daqiqasida zaxiradan maydonga tushdi.

"Fyullkrug "Milan"da o'ynashni juda xohladi va unga imkoniyat berishim to'g'ri bo'ldi. U o'zini ko'rsatishga chanqoq ekanligini darhol namoyon qildi. Niklas yaxshi o'ynadi, men unga shubha qilmadim. Bugun u ikkinchi qavatda foydali bo'ldi, to'pni himoyachilardan zo'r himoya qildi. Biz uchun bu yangilik emas. U yaxshi moslasha oldi," - dedi Allegri DAZN bilan suhbatda.

Yagona golga Rafael Leau mualliflik qildi.