Per-Emerik Obameyang Gabon hukumatining futbolchini terma jamoadan chetlatish haqidagi qaroriga izoh berdi

Frantsiyaning «Marsel» klubi hujumchisi va Gabon terma jamoasining sobiq futbolchisi Per-Emerik Obameyang mamlakat hukumatining uni milliy jamoa safidan chiqarish qaroriga munosabat bildirdi.

Afrikada yilning eng yaxshi futbolchisi unvoniga ilgari sazovor bo'lgan Obameyang X (Twitter) ijtimoiy tarmog'idagi postga javob qaytardi. Ushbu postda futbolchi terma jamoadagi muammolarning asosiy sababchisi sifatida ayblangan edi. Obameyang esa quyidagicha fikr bildirdi:

«Menimcha, jamoadagi muammolar men kabi kichik insondan ancha chuqurroq».

Eslatib o'tamiz, Gabon terma jamoasi 2026 yilgi Afrika millatlar kubogidan chiqib ketganidan so'ng, mamlakat hukumati milliy televidenie orqali bayonot e'lon qildi. Unda jamoaning Afrika millat kubogi guruh bosqichidan so'ng turnirni tark etganini "sharmandagarchilik" deb baholanib, Per-Emerik Obameyang hamda Ekele Manga terma jamoa safidan chetlatilgani, shuningdek, murabbiylar shtabi tarqatilgani ma'lum qilindi.

Ekele Manga Gabon terma jamoasi tarixida eng ko'p o'yin o'tkazgan futbolchi hisoblanadi (105 ta o'yin), Per-Emerik Obameyang esa milliy jamoaning eng yaxshi to'purari bo'lib, uning hisobida 41 ta gol bor.