AQSh JCh-2026 vaqtida dronlar hujumiga qarshi xavfsizlik choralarini kuchaytirish uchun 250 mln dollar ajratdi

AQSh 2026-yilgi futbol bo'yicha Jahon chempionati vaqtida uchuvchisiz uchish apparatlariga (dron) qarshi choralar ko'rish uchun 250 mln dollar ajratdi.

AQSh Favqulodda vaziyatlar bo'yicha federal agentligining (FEMA) ma'lum qilishicha, Vashington ma'muriyati Jahon chempionati o'yinlari o'tkaziladigan 11 shtat hamda poytaxt hududiga 250 mln dollar yo'naltirgan. Ushbu mablag'lar dronlarni aniqlash, identifikatsiya qilish, kuzatish va ularga qarshi kurashish imkoniyatlarini rivojlantirish uchun ishlatilishi mumkin.

Agentlik vakillarining ta'kidlashicha, so'nggi yillarda jinoyatchilar, terrorchilar va AQShga nisbatan dushmanona kayfiyatdagi xorijiy tuzilmalar dronlardan tobora faolroq foydalanmoqda.

“Biz dronlar bilan bog'liq xavf ortib borayotganini inobatga olib, Jahon chempionati xavfsizligini ta'minlash uchun tezkor harakat qilish zarurligini tushundik va aynan shuni amalga oshirdik”, dedi agentlik vakili.

Qayd etilishicha, 2026-yilda ham shtatlarga dronlarga qarshi choralar uchun yana 250 mln dollar ajratilishi rejalashtirilgan.

2026-yilgi futbol bo'yicha Jahon chempionati 11 iyundan 19 iyulgacha AQSh, Kanada va Meksikada bo'lib o'tadi. Turnirda ilk bor 48 ta terma jamoa ishtirok etadi. Jumladan, O'zbekiston terma jamoasi ham o'z tarixida ilk marta mundialda qatnashadi.

Fabio Kannavaro boshchiligidagi jamoa “K” guruhida Portugaliya, Kolumbiya hamda pley-off g'olibiga (Yamayka, Kongo hamda Yangi Kaledoniya) qarshi maydonga tushadi. Uchrashuvlar Meksika hamda AQSh hududida bo'lib o'tadi.