Arauxo jamoaga qaytganiga qaramay, «Espanol»ga qarshi o'yinda «Barselona» safida maydonga tushmaydi

«Barselona» himoyachisi va jamoa sardori Ronald Arauxo psixologik muammolarini hal etgandan so'ng «ko'k-anorranglilar» mashg'ulotlariga qaytganiga qaramay, Ispaniya chempionatining 18-turi doirasida «Espanol»ga qarshi o'yinda ishtirok etmaydi. Kataloniyaliklar bosh murabbiyi Xans-Diter Flik bu qaror sababini tushuntirib o'tdi.

«Uning qachon qaytishi o'ziga bog'liq. Hammasi joyida, ammo Ronald jismonan hali 100 foiz tayyor emas, u qachon to'liq qaytishini o'zi hal qilishi kerak. Bu uning o'zi uchun juda muhim.

Arauxo jamoadoshlari bilan suhbatlashdi, barcha uni qo'llab-quvvatlayotganini ko'ryapman va his qilyapman. U qaytdi, bu juda muhim futbolchi. Qaytishi uchun qancha vaqt kerak bo'lsa, shuncha vaqt oladi, lekin unda hammasi yaxshi», — dedi Flik.

Eslatib o'tamiz, Chempionlar ligasida «Chelsi»ga qarshi o'yindan (0:3) keyin Arauxo psixologik muammolar sabab «Barselona»ning barcha musobaqalardagi etti o'yinini o'tkazib yuborgan edi.