Amorim usullari sabab «MYu» rahbariyatida sabr-toqat tugab bormoqda

«Manchester Yunayted» rahbariyati bosh murabbiy Ruben Amorim faoliyatidan norozi bo'lib, unga nisbatan sabr-toqatni yo'qota boshladi. «Qizil iblislar» rahbarlarini portugaliyalik mutaxassis qo'llayotgan o'yin tizimi qoniqtirmayapti — jamoa raqib darvozasi oldida kam imkoniyatlar yaratayapti va Chempionlar ligasi zonasidan tobora uzoqlashib bormoqda. Bu haqda Caught Offside xabar bermoqda.

Manba ma'lumotlariga ko'ra, mankunianlar Amorim o'rniga ehtimoliy murabbiy rejasini ishlab chiqishni boshlashgan. «Manchester Yunayted» bosh murabbiyi lavozimiga nomzodlar qatorida Oliver Glasner («Kristal Pelas»), Andoni Iraola («Bornmut») hamda Xavi (sobiq «Barselona» murabbiyi) tilga olinmoqda.

Angliya chempionatining 19 turidan keyin «qizil iblislar» 30 ochko to'plab, turnir jadvalida 6-o'rinni egallab turibdi.