«Lokomotiv» yana 4 ta transferni e'lon qildi: Temurxo'ja Abduxoliqov va Sardor Mirzaev jamoaga qaytdi

Yangi mavsumga jiddiy tayyorgarlik ko'rayotgan «Lokomotiv» futbol klubi qishki transfer oynasida tarkibini bir qator futbolchilar bilan kuchaytirdi. «Temiryo'lchilar» safiga himoyachi Sunnatilla Poyonov, yarim himoyachi Nikolay Ivanov, shuningdek, klub muxlislariga yaxshi tanish bo'lgan Temurxo'ja Abduqoliqov va Sardor Mirzaev qayta qo'shildi.

21 yoshli himoyachi Sunnatilla Poyonov o'tgan mavsum «Surxon» tarkibida 24 ta uchrashuvda ishtirok etib, 1 ta gol muallifi bo'ldi. Shuningdek, u O'zbekiston U-20 terma jamoasi safida 4 ta bahsda maydonga tushgan. Yangi mavsumda Poyonov «Lokomotiv» sharafini himoya qiladi.

Belarus chempionatining o'tgan mavsumida bronza medallarini qo'lga kiritgan 25 yoshli markaziy yarim himoyachi Nikolay Ivanov ham jamoaga qo'shildi. U Belarusning «Slaviya» klubi safida 31 ta o'yinda 7 tadan gol va assist qayd etgan, shuningdek, chempionatda 36 ta golli vaziyat yaratib, ushbu ko'rsatkich bo'yicha 5-o'rinni egallagan. Qiziq jihati, Ivanov Rossiya futbol tarixi­dagi eng tezkor gol muallifi hisoblanadi — u 2024 yilda «Mashuk» tarkibida «Ximki» darvozasini 4-soniyadayoq ishg'ol qilgan.

Shu bilan birga, 4 mavsumlik tanaffusdan keyin «Lokomotiv»ning eng sermahsul futbolchilaridan biri Temurxo'ja Abduxoliqov jamoaga qaytdi. U klub tarixida 161 ta o'yinda 79 ta gol va 10 ta assist qayd etgan. O'tgan mavsumda «Bunyodkor» safida harakat qilgan hujumchi 25 ta bahsda 8 ta gol va 3 ta assist muallifi bo'ldi.

Yana bir katta qaytish — yarim himoyachi Sardor Mirzaev bilan bog'liq. 2014–2019 yillar davomida «Lokomotiv» safida 166 ta o'yinda 36 ta gol va 11 ta assist qayd etgan Mirzaev 2020 yildan buyon faoliyatini xorijda va boshqa klublarda davom ettirgan. U Taylandning «Muangtong Yunayted» jamoasida 91 ta o'yinda 29 ta gol va 18 ta assist qayd etgan, o'tgan mavsumni esa OKMK tarkibida o'tkazdi.

Shu tariqa, «Lokomotiv» yangi mavsum oldidan tarkibini tajriba va yoshlik uyg'unligi bilan mustahkamlab, Superligada yuqori maqsadlar sari qadam qo'ymoqda.