«Real» Mbappening jarohati haqidagi ma'lumotni tasdiqladi

Madridning «Real» klubi rasmiy saytida jamoaning frantsiyalik hujumchisi Kilian Mbappening jarohat olgani haqidagi ma'lumotni tasdiqladi.

«Bugun tibbiy xizmatimiz tomonidan o'tkazilgan tekshiruvlar natijasiga ko'ra, futbolchimiz Kilian Mbappeda chap tizza bog'lamlarining cho'zilishi aniqlandi. Klub futbolchining tiklanish jarayonini kuzatib boradi», — deyiladi «qaymoqranglilar» bayonotida.

Mbappe 2024 yil yozidan buyon «Qirollik klubi» safida to'p surib kelmoqda. Hozirga qadar u Madrid jamoasi tarkibida 83 ta uchrashuvda maydonga tushib, 73 ta gol urdi va 10 ta golli uzatma muallifi bo'ldi. Uning klub bilan shartnomasi 2029 yil iyuniga qadar amal qiladi.