«Real» Mbappeni yo'qotdi

Kilian Mbappe tizzasidagi muammo tufayli Ispaniya Superkubogini o'tkazib yuboradi. Bu haqda L'Equipe xabar bermoqda.

Manbaga ko'ra, frantsiyalik futbolchi bir necha hafta ketma-ket tizzasida noqulaylik his qilgan. Avvaliga bu arzimas muammo bo'lib tuyuldi, ammo chorshanba kuni ertalab o'tkazilgan tibbiy ko'rik paylarning shikastlanganini ko'rsatdi, bu esa uzoq vaqt davomida tiklanishni talab qiladi.

Mbappe qachon maydonga qaytishi hozircha noma'lum, biroq 8 yanvarga belgilangan Ispaniya Superkubogi yarim finalida "Atletiko"ga qarshi o'yinda u jamoaga yordam bermasligi aniq.

Joriy mavsumda 27 yoshli forvard klublar miqyosida 24 ta o'yinda 29 ta gol va 5 ta golli uzatmaga mualliflik qilgan.