Unai Emeri nega «Arsenal»dan mag'lub bo'lganidan so'ng Mikel Artetaga qo'l bermaganini tushuntirdi

Birmingemning «Aston Villa» jamoasi bosh murabbiyi Unai Emeri APLning 19-turida «Arsenal»ga qarshi o'yindan keyin nega londonliklar ustozi Mikel Arteta bilan qo'l siqishmagani haqida izoh berdi. Kecha bo'lib o'tgan uchrashuv «kanonirlar»ning 4:1 hisobidagi g'alabasi bilan yakunlandi.

«Qaytarib ko'ring. O'yin tugagach, mening doimiy tartibim bir xil: avval raqib jamoa murabbiyi bilan qo'l berib ko'rishaman, keyin o'z murabbiylarim va futbolchilarim bilan uchrashaman yoki kiyinish xonasiga yo'l olaman. Men kutdim. Albatta, u g'alabadan xursand edi va o'z shtabi bilan band bo'ldi, shuning uchun men ketishga qaror qildim. Bu men uchun muammo emas. Agar raqib murabbiy men tomon kelmasa, odatda kutib turaman. Ammo sovuq edi…», — deya Emeri.