Futbol bo'yicha U-19 Osiyo chempionatida bevosita qatnashish istagidamisiz?

Joriy yilning oktyabr oyida O'zbekiston 19 yoshgacha bo'lgan futbolchilar o'rtasidagi Osiyo chempionatiga mezbonlik qiladi.

2 hafta davom etadigan mazkur nufuzli musobaqani har jihatdan yuqori saviyada tashkil etish bo'yicha O'zbekiston futbol assotsiatsiyasi tomonidan keng qamrovli ishlar olib borilmoqda.

Qit'amizning eng kuchli jamoasini aniqlash maqsadida 16 ta yurt terma jamoasi o'zaro bahs yuritadigan musobaqa davomida ishtirokchi jamoalar, shuningdek, xorijiy mehmonlar, turnir tashkilotchilari, qolaversa uchrashuvlar rasmiylariga har jihatdan ko'mak berishi uchun ko'ngilli – volontyorlar jalb etilishi ko'zda tutilgan.

Volontyorlar xorijlik mutaxassislarga o'z ishlarini to'la-to'kis ado etishda har jihatdan ko'makchi bo'lishadi. Bunda ayniqsa, volontyorlarning ingliz tilini mukammal bilishi as qotadi.

Shu munosabat bilan, O'zbekistonda bo'lib o'tadigan U-19 Osiyo chempionati davomida ko'ngilli – volontyor sifatida faoliyat olib borish niyatida bo'lgan, bu orqali o'zining futbol hamda til borasidagi bilim va ko'nikmalarini yanada mustahkamlash niyatidagi yoshlar [email protected] elektron-pochtasiga o'z ma'lumotnomalarini va telefon raqamlarini yozib yuborishlari mumkin.

Saralab olinadigan ko'ngilli – volontyorlar uchun musobaqa oldidan seminar tashkil etiladi.