Grand terma jamoalar tarixidagi eng yaxshi to'purar futbolchilar bilan tanishing

Stadion.uz Jahonning eng kuchli terma jamoalari tarixidagi eng yaxshi to'purarlar bilan qisqacha tanishtirib o'tadi.

Bundan avvalroq grand klublar tarixidagi eng yaxshi to'purarlar bilan tanishtirib o'tgan edik. Endi navbat terma jamoa to'puarlariga keldi.

Frantsiya

Tieri Anri bu borada yaqqol farq bilan etakchilik qilmoqda. “Arsenal” va Frantsiya futboli afsonasi hisobida 51 ta gol mavjud. Qahramonimiz 123 ta o'yinda maydonga tushgan bo'lib, jamoa safida katta yutuqlarga erishgan. Unga hali beri etib olishning iloji yo'qdek tuyuladi. Sababi, Frantsiyaning ikkinchi to'purari Mishel Platinida 41 ta gol mavjud.

Xorvatiya

So'nggi JChda nimalarga qodirligini barchaga ko'rsatib qo'ygan Xorvatiya terma jamoasi afsonasi Davor Shukerning natijasi kishini hayratlantirmay qolmaydi. 69 ta uchrashuv va 45 ta gol. Undan keyingi o'rinda Manjukich (33 ta gol) va Ivan Perishich (24 ta gol) bormoqda.

Angliya

Ueyn Runi nafaqat “qizil iblislar”, balki Angliya futbol tarixida ham eng yaxshi hujumchi sifatida qolishi aniq. Ayni damda Runi hisobida 53 ta gol mavjud bo'lib, futbolchi 120 ta uchrashuvda inglizlar sharafini himoya qilishga ulgurgan.Runi Bobbi Charlton o'rnatgan rekordni(49 ta gol) yangilagan birinchi futbolchi bo'lib turibdi. Zamonaviy futbolning yorqin hujumchisi Harri Keyn hisobida 45 ya gol mavjud.

Belgiya

So'nggi yillarda katta futbolga shaxdam qadamlar bilan kirib kelgan Belgiyani eslab o'tmaslik mumkin emas. Ushbu jamoa tarixidagi eng yaxshi to'purar maqomi hozircha Lukakuga (45 ta gol) tegishli bo'lib turibdi. Undan keyingi o'rinda borayotgan Eden Azar xisobida 30 ta gol mavjud.

Ispaniya

David Villa terma jamoa uchun kerakli paytda paydo bo'lgan hujumchi sifatida ispaniyalik muxlisalr yodida qolishi aniq. Bundan tashqari, hujumchi terma jamoa tarixidagi eng yaxshi to'purar futbolchi sanaladi. U 59 bor Ispaniya uchun gol kiritgan yagona futbolchi bo'lib turibdi. Undan keyingi o'rinlarda afsonaviy Raul va Fernando Torreslar borishmoqda.

Germaniya

Asli polyak bo'lishiga qaramay, nemis futbolida o'zidan yorqin iz qoldirgan hujumchi haqida soatlab fikr bildirish mumkin. JCh tarixlaridagi eng ko'p gol kiritgan MiroslavKloze “nemis mashinasi” tarixida ham eng yaxshi bo'lib turibdi. Uning hisobida 71 ta gol mavjud bo'lib, undan keyingi o'rinda Gerd Myuller o'zining 68 ta goli bilan bormoqda. Kuchli uchlikni yana bir polyak Podolski (49 ta gol) yakunlab beradi.

Portugaliya

Bu ko'rsatgich borasida Ronaldu istalgancha maqtansa arziydi. Portugaliya libosida 168 bor maydonga tushgan Krish 99 bor raqib darvozasini ishg'ol qilishni uddalagan. Ronalduni quvib o'tish yaqin 10 yil ichida hech kimga nasib etmasligi aniq. Sababi, uni ta'qib qilib kelayotgan Pedro Pauletada atigi 49 ta gol mavjud. Xatto afsonaviy Eisebio ham Portugaliya uchun 41 bor gol kiritgan xolos.

Italia

Luiji Riva nomi yangi avlod muxlislari uchun notanish ekanligni aniq. Qahramonimiz 69-70-yillar oralig'ida Italiyaning hujumlarini yakunlovchi futbolchi sifatida nom qozongan. Riva atigi 35 ta golga mualliflik qilgan bo'lsada, birorta italiyalik hujumchi undan bu rekordni tortib olishni uddalay olgani yo'q. Undan keyingi o'rinda Badjo, Del Piero va Inzagilar borishmoqda.

Gollandiya

Robin van Persi hech qachon gol urishda muammo sezmaydigan hujumchilardan biri edi. Bejizga uni Gollandiyada o'z avlodining eng yaxshi futbolchisi deb atashmaydi. “uchar golland” hisobida 50 ta gol mavjud bo'lib, u bu natijaga erishish uchun 102 ta o'yinda maydonga tushgan. Undan keyingi o'rnlarni Huntelar, Klyuvert va Berkamplarlar egallashgan.

Braziliya

Futbol qiroli Pele “pentakampionlar” tarixidagi eng yaxshi to'purarlikni Ronaldoga (62 ta gol) ham, Neymarga (60) ham bermay kelmoqda. U JChda g'olib chiqibgina qolmay, jamoasi uchun 77 ta gol kiritgan yagona futbolchi bo'lib turibdi.

Argentina

Albatta Messi! Yana kim bo'lishi mumkin? 138 ta uchrashuv va 70 ta gol. Argentinalik muxlisalrning tanqidlariga qaramay Messi jamaosi uchun gol kiritishda davom etmoqda.      Undan keyingi o'rinda Batistuta o'zining 54 ta goli bormoqda. Kuchli uchlikni Aguero 42 ta gol bilan yakunlab beradi. Argentina futbolida Messidanda mashxurroq Maradona hisobida 34 ta aniq zarba bor.

Urugvay

Urugvay so'nggi yillarda katta futbolda grandlar qatoridan bejiz joy olmadi. Tarkibida Suares va Kavani singari super hujumchilari bor jamoa bunga loyiq desak, adashmagan bo'lamiz. Aynan Suares hozircha to'purarlar orasida 59 ta gol bilan etakchilik qilmoqda. Afsuski, mana shu gollardan biri terma jamoamiz darvozasidan joy olgan. Undan keyingi o'rinlarda Kavani va Forlanlar bormoqda.

Manba: Stadion.uz