Taqiqqa qaramay, «Manchester Siti» EChLda ishtirok etishi mumkin

Xabaringiz bor, UEFA "Manchester Siti" klubini ikki yilga evrokuboklardan chetlatish haqida qaror qabul qildi. Bundan tashqari, "shaharliklar" 30 million evro miqdorida jarimaga tortilishdi.

Manchesterliklar qo'l qovushtirib o'tirishmoqchi emas. Jamoaning EChLda ishtirok etmasligi klubga jiddiy moliyaviy zarar etkazadi. Bundan tashqari, "Siti" yangi futbolchilarni qo'lga kiritishi, etakchilarni ushlab qolishi qiyin kechadi. Ammo Xosep Gvardiola va jamoa rahbariyati xavotirga tushmayapti.

Huquqshunoslarning fikricha, "Man Siti" Evropa chempionlar ligasining 2020/2021 yilgi mavsumida ishtirok etish imkoniyatini saqlab qolishi mumkin. Jamoa Lozanna shahridagi Sport arbitraj sudiga murojaat qiladigan bo'lsa, yakuniy qaror qabul qilingunga qadar UEFA qarorini vaqtinchalik to'xtatib turishni so'rashi mumkin. Shunda "Siti" EChLning kelasi mavsumida qatnashishi mumkin. Ammo keyinchalik CAS UEFAning qarorini o'z kuchida qoldirsa, "shaharliklar" EChLning 2021/22 va 2022/23 yilgi mavsumlarini o'tkazib yuborishiga to'g'ri keladi.

Sanktsiyadan qutulib qolishning yana bir yo'li mavjud. Angliyaliklar Sport arbitraj sudidan ishni tezroq ko'rib chiqishni so'rashi mumkin. EChL-2020/2021 guruh bosqichiga qur'a tashlash marosimigacha (27 avgust) CAS diskvalifikatsiya haqidagi qarorni bekor qilsa, "Siti" musobaqada ishtirok etish huquqini saqlab qoladi. Ammo bunday holatda klub ham, UEFA ham o'z haq-huquqini isbotlash uchun etarli vaqtga ega bo'lmaydi.

Shu bois, "Manchester Siti" uchun birinchi variant ma'qulroq ko'rinmoqda. Jamoa UEFA qarorining to'liq matnini olganidan keyin apellyatsiya berish uchun 10 kunlik vaqtga bo'ladi.