Xayrulla Hamidovdan anons: Hech qachon ishonishdan to'xtama!
/ Kiritdi: BestMaster Ko'rilgan: 297
Evropa chempionlar ligasi pley-off o'yinlariga start beriladi bugun.
Haqiqiy futbol bayrami. Va bu bosqich g'oliblik uchun asosiy da'vogarlar ishtirokida ochib berilayotgani yanada quvonarli hol.
Dortmundga yo'l oladigan PSJ “ManSiti mojarosi” ko'tarilgan paytda turnirni qay suratda davom etarkan, menga qiziq shaxsan. Axir, “shaharliklar” apellyatsiyasida Parij klubi nomi aytiladi baribir. Yollangan aqlli advokatlar “agar bizga ikki yil bersanglar, anoviga to'rt yil berishlaring kerak” deyishlariga va shu bilan PSJning xalovatini o'g'irlarlariga ishonaman men. “Borussiya” foydalanib qolsa qolgani...
Mayli, bu ishlar o'z yo'liga. Menga Madriddagi o'yin topshirilgan. “Vanda Metropolitano”, shuningdek “Peyneta” deb ataladigan supero'yingohda “Atletiko” EChL g'olibini qabul qiladi. APLning changini chiqarib tashlagan “Liverpul” o'zga sayyora vakili sifatida tashrif buyuradi o'yinga. Klopp yigitlari ikki yilning ichida butkul boshqa xarakterdagi jamoaga aylanib ulgurishdiki, hozirda barcha g'oliblik uchun asosiy da'vogar sifatida “qizillar”ni ko'rayotgani sir emas.
“Atletiko” tarkiban va jismonan hozirgi quturgan “Liverpul”ga teng emas. Hamma ko'rib, bilib turibdi. Milliy chempionatlardagi darajalar turlicha. Biroq, Madrid klubi boshida Diego Simeone turar ekan, muxlislari nedir mo'jizalar kutishga haqlilar.
Hozir Madrid kanallarida 2014 yilgi EChL bahslari, ko'rinishidan imkonsiz o'yinlar – “Chelsi” bilan bahs, 2016 yilgi “Bavariya”ga qarshi bellashuv va qatorlashtirib Messi-Suares-Neymariga ega bo'lgan “Barselona”ga qarshi uchrashuvlar kun bo'yi namoyish etilayotgan bo'lsa kerak. “Imkonsiz ishning o'zi yo'q” deb xitob qilayotgan bo'lsalar kerak ko'rsatuv ijodkorlari.
Ispanshunos do'stimiz Zokirjon Xoliqov aytganidek, ikki jamoaning shiorida “hech qachon” so'zlari bor. “Liverpul”nikini bilasiz, “Atletiko”niki – “Hech qachon ishonishdan to'xtamang!” Rolikning oxirini tasavvur qildingiz, a?!
“Liverpul” doimgidek xotirjam. Dahshatli mavsum, rekordlar, ketma-ket kelayotgan zafarlar, omadning har bir o'yinchi yoqasiga yopishib olgani “Klopp bandasi”ga etarli. Hatto ular Ispaniyada yirik hisobda yutqazib qo'yishdan-da qo'rqishmaydi. Uch haftadan keyin “Enfild” borku, deb dillarga qo'rqinch solib turaveradi.
Ana shunaqa darajadagi buyuk klubga qarshi bugun Simeone yana yigitlarini safga tortadi. Qo'shin zo'r, ammo bu maydonga chiqqan mag'lubiyatni o'ylamaydi. Hech qachon o'ylamaydi. Shiorida aytilganidek...
Soat 01:00da Uzreport kanalida! Hech qachon voz kechib bo'lmas o'yin. Birga kuzatamiz!
Xayrulla Hamidov.
Bosh sahifaga
282
