Mahmud Muradov Habib va Toni Fergyuson bilan bir oqshomda oktagonga chiqadi

Aralash jang san'ati (MMA) bo'yicha o'rta (-84 kg) vazn toifasida oktagonga chiqib kelayotgan o'zbekistonlik Mahmud Muradovyning (24-6, 15 KO) UFCdagi uchinchi jangi muddati va raqibi aniq bo'ldi. Bu haqda GoSport.uz internet-nashri sportchining Instagrmadagi sahifasiga asoslanib xabar bermoqda.

Ma'lum bo'lishicha, Mahmud Muradov MMAning eng nufuzli turniri bo'lgan UFCdagi uchinchi jangida amerikalik Karl Robersonga (9-2, 6 KO) qarshi oktagonga chiqadi. Jang 18 aprel kuni Nyu-York shahrida, Bruklindagi “Barclays center” arenasida bo'lib o'tadi. Shu kuni UFC 249 turniri doirasida so'nggi 10 yillikning eng kutilgan jangi bo'lib o'tadi va unda engil vazn chempioni Habib Nurmagomedov Toni Fergyusonga qarshi chempionlik kamari uchun jang qiladi.

Ma'lumot uchun, 29 yoshli Kral Roberson jami 11ta jangda (UFCda 6ta jang, 4 g'alaba) oktagonga chiqib ularning 9tasida g'alaba qozongan. Oltita jangini muddatidan oldin (ikkitasi nokaut evaziga) g'alaba bilan tugatgan.

Eslatib o'tamiz, Mahmud Muradov UFCdagi debyut jangida italiyalik Alessio di Kirikoni (12-4, 9 KO) ochkolar hisobiga ko'ra, ikkinchi jangida Trevor Smitni (15-10, 10 KO) uchinchi raundda nokaut evaziga mag'lubiyatga uchratgan.

Manba: gosport.uz