OFKga a'zo assotsiatsiyalar prezidentlari hamda bosh kotiblari ishtirokidagi konferentsiyaning birinchi kunidan o'rin olgan tadbirlar bo'lib o'tdi

17 oktyabr kuni Saudiya Arabistonining Riyod shahrida Osiyo Futbol Konfederatsiyasiga a'zo assotsiatsiyalar va mintaqaviy assotsiatsiyalar prezidentlari hamda bosh kotiblari ishtirokidagi 2025 yilgi konferentsiya start oldi. Unda tashkilotga a'zo mamlakatlar qatorida O'FA birinchi vitse-prezidenti Ravshan Irmatov va bosh kotib Avaz Maksumov ishtirok etdi.

Uchinchi marotaba o'tkazilayotgan mazkur konferentsiyaning ochilish marosimida OFK Prezidenti Shayx Salmon bin Ibrohim Al Xalifa oxirgi yillarda OFK musobaqalarni yanada mustahkamlovchi va yorqin kelajak poydevorini yaratuvchi muhim islohotlar amalga oshayotganini qayd etdi:

"Biz islohotlar yo'lida qat'iy intilamiz. Umumiy maqsadlarimizga erishish yo'lida tinimsiz mehnat qilishda davom etamiz, bunga faqatgina a'zo va mintaqaviy assotsiatsiyalar faoliyatini rivojlantirish orqali erishamiz. Shu sababdan ham ushbu konferentsiya juda muhim ahamiyatga ega — u ishtirokchilarga yangi yutuqlarga erishish uchun zarur bilim, vosita va aloqalarni taqdim etish maqsadida tashkil etilgan", dedi Shayx Salmon.

Tadbir davomida Osiyo Futbol Konfederatsiyasining texnik direktori Endi Roksburg tashkilotning dunyodagi etakchi konfederatsiyaga aylanish missiyasi hamda Osiyo jamoalarining muvaffaqiyatini ta'minlash bo'yicha strategiyasini bayon qildi. So'ng UEFAning ijtimoiy va ekologik barqarorlik bo'yicha ijrochi direktori Mishele Uva futbolning ta'siri maydondan tashqariga ham chiqishini ta'kidladi.

Konferentsiyaning birinchi kunida "Yuqori samaradorlikka ega milliy assotsiatsiyalar" mavzusida fikr almashildi. Unda O'FA birinchi vitse-prezidenti Ravshan Irmatov, Filippin futbol Federatsiyasi prezidenti Jon Antoni V. Guterres, Yaponiya futbol assotsiatsiyasi prezidenti Tsuneyasu Miyamoto, Iordaniya futbol assotsiatsiyasi bosh kotibi Samar Nassar, Okeaniya Futbol Konfederatsiyasi operatsion direktori Frederik Giemon ishtirok etdilar.

Bugun konferentsiyaning ikkinchi kungi dasturida OFK bosh kotibi Datuk Seri Vindsor Jon, FIFAning a'zo assotsiatsiyalar bilan ishlash bo'yicha bosh direktori Elkhan Mammadov, Okeaniya Futbol Konfederatsiyasi operatsion direktori Frederik Giemon chiqish qiladilar. Shuningdek, kun davomida OFK bosh kotibi o'rinbosari — a'zo assotsiatsiyalar bilan ishlash bo'yicha mas'ul Vohid Kardani moderatorligida o'tadigan ikkinchi panel muhokamasi ham tashkil etiladi.

Manba: Telegram.me/FAUzbekistan