Azizjon G'aniev: «Olimpiadaga yo'llanmani qo'lga kiritamiz»

O'zbekiston olimpiya terma jamoasi yarim himoyachisi Azizjon G'aniev 23 yoshlilar o'rtasidagi Osiyo chempionati uchinchi o'rin uchun Avstraliyaga qarshi o'yin oldidan AFC rasmiy saytiga intervyu berdi.

“Biz Saudiya Arabistoniga yutqazdik, chunki o'z imkoniyatlarimizdan foydalana olmadik va so'nggi daqiqalarda e'tiborni yo'qotdik.

Hozirda bu borada hech narsa qila olmaymiz, ammo hali oldinda yana bitta turnirning eng muhim o'yini bor.

Oldinda bizni kuchli raqibga qarshi qiyin o'yin kutmoqda, biroq biz muxlislarimizni xursand qilish uchun qo'limizdan kelgancha harakat qilamiz. Biz Olimpiadaga yo'llanmani qo'lga kiritish uchun astoydil harakat qilyapmiz.

Terma jamoa libosini kiyish katta ma'suliyat yuklaydi. Siz bu libosda maydonga tushganingizda boringizni berib harakat qilishingiz kerak va biz buni Avstraliyaga qarshi ko'rsatamiz.

Avstraliya juda kuchli jamoa. Ular qiyin raqib, lekin biz ularni yaxshilab o'rgandik. Ularda jismonan baquvvat va indvidual mahoratga ega futbolchilari bor. Ammo biz o'z o'yinimizni ko'rsatamiz va umid qilaman, Olimpiadaga yo'llanmani qo'lga kiritamiz”, -deydi futbolchi.

Manba: AFC.com