«Lokomotiv» stadioni yoritish quvvati 1500 lyuksga etkaziladi

Xabaringiz bor, futbol klublari “O'FA va O'zPFL tomonidan o'tkaziladigan musobaqalarda ishtirok etuvchi futbol klublarini litsenziyalash va professional futbol klubi maqomini belgilash bo'yicha reglament” asosida yangi mavsum uchun tadorik olib borishmoqda.

PFL aynan mana shu reglament asosida klublar oldiga ma'lum talablarni qo'yadi. Jumladan, reglament va yangi mavsum uchun ishlab chiqilgan “Stadionlar bo'yicha nizom” talablariga ko'ra, Superliga yoki Pro ligada ishtirok etadigan klubning uy stadionida kamida 1200 lyuks, tavsiya bo'yicha esa 1500 lyuks yoritish quvvatiga ega projektorlar o'rnatilgan bo'lishi lozim.

“Lokomotiv” klubi uy stadionini monitoringdan o'tkazgan PFL ishchi guruhi o'lchov natijalariga ko'ra, ushbu stadion projektorlari maydonning 15 ta nuqtasidan o'lchanganida o'rtacha 844 lyuksni ko'rsatdi. Klub vakillariga bu borada ish olib borilishi lozim ekani ta'kidlandi.

“Lokomotiv” klubi yaqin vaqt ichida bu borada ish olib borib, stadion yoritish quvvatini kamida 1500 lyuksga etkazishga va'da berdi.