Eron klublari OChL-2020da ishtirok etishdan bosh tortishi mumkin

Osiyo futbol konfederatsiyasi Eron jamoalarining uy o'yinlarini neytral maydonga o'tkazish haqida qaror qabul qildi. Ushbu oyda bo'lib o'tgan voqealar (Eron-AQSh qarama-qarshiligi) tufayli xavfsizlik nuqtai nazaridan shunday qarorga kelindi.

Ushbu qaror Eron klublari va barcha yoshdagi terma jamoalarga tegishli.

OFKning bu qarorini muhokama qilish uchun Eron futbol federatsiyasi hamda mamlakatning Osiyo chempionlar ligasida ishtirok etadigan 4 klubi — "Persepolis", "Sepohon", "Istiqlol" va "Shahr Xodro" rahbariyati yig'ilishdi. Klublar, agar OFK o'z qarorini o'zgartirmasa, fors klublariga Eronda o'yin o'tkazishga ruxsat berilmasa, ular norozilik ramzi sifatida Chempionlar ligasini tark etish haqida qaror qabul qilishdi. Eron tomoni o'z xulosasini OFKga yo'lladi.

"Eron xalqi OFK qaroridan norozi bo'ldi. Bu qaror mamlakatimiz uchun haqoratdan boshqa narsa emas. Uy o'yinlarini o'tkazish — bizning huquqimiz. Biz o'z huquqimizni himoya qilamiz.

Bunday holatda klublarimiz OChLda ishtirok etmaslikka qaror qilishdi. Eron futbol federatsiyasi va Sport vazirligi ularni qo'llab-quvvatlaydi. Eron — xavfsiz mamlakat. Bizning chempionat esa eng ko'p muxlis tashrif buyuradigan liga hisoblanadi. Shu bois, neytral maydonda o'yin o'tkazishga sabab yo'q", — deya bayonot berdi Eron futbol federatsiyasi prezidenti Haydar Bahorvand.

"Persepolis", "Sepohon" klublari OChLni guruh bosqichidan boshlasa, "Istiqlol" va "Shahr Xodro" 21 yanvar kuni 2-saralash bosqichida ishtirok etishlari kerak edi. Ammo bu o'yinlar 25 yanvarga ko'chirilishi mumkin.

Umuman olganda, OFK ushbu murakkab vaziyatda qanday qabul qiladi, hozircha aniq emas. Agar Eron jamoalari OChLdan chetlatilsa, guruhlar boshqacha ko'rinishga ham kelishi mumkin.

OFKning yakuniy qarorini kutamiz.

Manba: www.stadion.uz.