Lyubinko Drulovich: «Ishontira olamanki, ertaga barcha yigitlarlar o'yinga shay bo'lib tushishadi»

Tailandda 23 yoshgacha futbolchilar o'rtasida Osiyo chempionati o'tkazilmoqda. Musobaqada ishtirok etayotgan O'zbekiston olimpiya terma jamoasi chorak finalda BAA bilan kuch sinashadi.

Mazkur bellashuvdan bir kun oldin jamoalar bosh murabbiylari o'rtasida matbuot anjumani o'tkazildi. Unda olimpiya terma jamoamiz bosh murabbiyi Lyubinko Drulovich quyidagi fikrlarni bildirib o'tdi. 

– Ertaga qiyin o'yin kutib turibdi. 2 oy muqaddam bu jamoa bilan o'rtoqlik o'yinida maydonga tushib, 1:2 hisobida mag'lub bo'lgan edik. Ammo bu umuman boshqa bosqich. Men yigitlarimga ishonaman. Barcha o'yinlarimizni tahlil qilib chiqib ayta olamanki, biz bu to'siqlardan o'tib Olimpiada yo'llanmasiga ega chiqamiz. Biz raqibga nisbatan 1 kun ko'p dam olishga muvaffaq bo'ldik. O'ylaymanki, bu jihat ham bizga foyda beradi”.

– Siz musobaqaga amaldagi sovrinni himoya qilish uchun keldingiz. Tarkibda 2 yil muqaddam o'ynaganlar ham bor. Ularning tajribasi qanchalik foyda bermoqda?

– Ha, ayni damda jamoadagi 8 nafar yigitimiz Xitoyda chempion bo'lishgan edi. Ulardagi ulkan tajriba mana shunday katta musobaqalarda foyda beradi. Bu Osiyo chempionati Olimpiadaga yo'llanma beradi. Shu bois ham jamoalar turnirga astoydil tayyorlangan. Bu oson bo'lmaydi, lekin titulni himoya qilishga harakat qilamiz va bu yo'lda olg'a intilishda davom etamiz.

– Koreya bilan o'yinda futbolchilarda charchoq alomati ko'rinib turardi. Chorak final bahsiga ularni qanday tayyorlamoqdasiz?

– Aytib o'tganimdek, bizda raqibga qaraganda 1 kun ko'proq dam olish imkoni bor. Yana bir jihati guruh bosqichida bizga jiddiy va kuchli raqiblar duch kelishgan edi. Hozir murabbiylar shtabi futbolchilarni bo'lajak bahsga tayyorlash bo'yicha katta ish olib borimoqda. Ishontira olamanki, ertaga barcha yigitlarlar o'yinga shay bo'lib tushishadi.