JCh-2026 saralash. O'zbekiston Qatarni yirik hisobda mag'lub etdi

Osiyo mintaqasida JCh-2026 saralashining 3-bosqichi so'nggi turi doirasida O'zbekiston terma jamoasi "Bunyodkor" stadionida Qatarni qabul qildi va yirik hisobda g'alaba qozondi.

Birinchi bo'limning 28-daqiqasida Aziz Turg'unboev o'ng qanotdan mehmonlarning ikki himoyachisini aldab o'tdi va o'tkir burchak ostida kuchli zarba yo'lladi. To'p to'singa tegib, to'rga borib tushdi. Qatar posbon bu zarba qarshisida ojiz qoldi.

Butun o'yin davomida jamoamiz hujumkor futbol namoyish etishdi. Milliy jamoamizning bu harakatlari ikkinchi bo'lim so'ngida o'z samarasini berdi. O'yinning asosiy tugashiga 4 daqiqa qolganida Iskanderovning ajoyib uzatmasidan keyin Shomurodov darvozabon bilan yakkama-yakka vaziyatga chiqib ketdi va hisobni 2:0 ko'rinishga keltirdi.

Ikkinchi bo'limga qo'shib berilgan 2-daqiqada esa zaxiradan maydonga tushgan Igor Sergeev to'pga ilk teginishidayoq darvozani ishg'ol qildi. Burchakdan etkazilgan to'pni "Paxtakor" forvardi bosh bilan darvozaga joylab qo'ydi — 3:0!

Shu tariqa, O'zbekiston ushbu bosqichni 21 ochko bilan yakunladi.

JCh-2026 saralash. 3-bosqich. "A" guruhi, 10-tur
O'ZBEKISTON - QATAR - 3:0
Gollar: Aziz Turg'unboev (28), Eldor Shomurodov (86), Igor Sergeev (90+2)