Hamid Estiliy eronlik muxlislardan uzr so'rab, O'zbekistonga omad tiladi

Eron olimpiya terma jamoasi bosh murabbiyi Hamid Estiliy jamoasi pley-offga chiqa olmagani uchun muxlislardan uzr so'radi.

Eslatib o'tamiz, forslar guruhda 4 ochko to'plashdi, ammo to'plar nisbatiga ko'ra O'zbekistondan ortda qolishdi.

"Pley-offga chiqa olmaganimiz uchun eronlik ishqibozlardan uzr so'rayman. Shogirdlarim musobaqa davomida qo'ldan kelgan barcha ishni qilishdi. Ular juda ko'p mehnat qilishdi va yaxshi o'yinlar ko'rsatishdi. Bunisi men uchun muhim.

Bu o'yinchilar — Eron futbolining kelajagi. Mutasaddilar ular haqida qayg'urishlari kerak. Janubiy Koreya va O'zbekistonga esa omad tilayman. Biz Koreyadan mag'lub bo'lishga haqli emasdik va O'zbekistonni mag'lub etishimiz shart edi.

Xitoyga qarshi o'yinda raqib darvozasi tomon 25ta zarba berdik, 8ta gol urish imkoniyatga ega bo'ldik. Ammo futbolchilar imkoniyatlarni qo'ldan chiqarishdi. Biz kamida 3:0 hisobida mag'lub etishimiz kerak edi. Ammo to'plar farqiga ko'ra keyingi bosqichga chiqa olmadik. Buning uchun uzr so'rayman", — dedi Estiliy Xitoyga qarshi bo'lib o'tgan o'yindan keyin.