Eron U23 murabbiyi: «Nima qilishni yaxshi bilamiz»

Eron olimpiya terma jamoasi bosh murabbiyi Hamid Estiliy Osiyo chempionatining 1-turi doirasida O'zbekistonga qarshi bo'ladigan o'yin oldidan o'z fikrlarini bildirib o'tdi.

"Odatda Eron terma jamoasi Osiyoning eng yaxshi jamoalari safiga kiradi. Biz haqiqatan ham kuchlimiz, ammo ilgari Olimpiya o'yinlari saralash bosqichida biz taqvim bilan bog'liq muammolarga duch kelganmiz. O'yinlar FIFA kunlaridan boshqa paytga qo'yilgani uchun eng yaxshi futbolchilarimiz bilan ishtirok eta olmaganmiz. Bu safar esa o'yinchilarni yig'ib, o'quv-mashg'ulot yig'inini va o'rtoqlik o'yinlarini o'tkazish imkoniyatiga ega bo'lyapmiz.

Bu guruhdan o'rin olgan barcha 4ta jamoa keyingi bosqichga chiqish uchun imkoniyatga ega. Biz O'zbekistonni yaxshi bilamiz. Ularning yaxshi murabbiyi va yaxshi futbolchilari bor. Professional ligamizdan eng yaxshi eronlik futbolchilarni yig'ishga muvaffaq bo'ldik. Biz — Eronmiz. Nima qilishni bilamiz», — dedi Estiliy.

Eslatib o'tamiz, O'zbekiston va Eron olimpiya terma jamoalari o'rtasidagi o'yin Toshkent vaqti bilan 15:15da boshlanadi.