Angliya 4-divizioni klubi futbolchisi «Manchester Siti» himoyachisi ustidan kuldi

Angliyaning to'rtinchi divizioni vakili «Port Veyl» klubi hujumchisi Tomas Poup «Manchester Siti» himoyachisi Jon Stounz ustidan yana kuldi.

Angliya terma jamoasi 2019 yilning yozida Gollandiyaga 1:3 hisobida yutqazganidan keyin:

«Ha, men to'rtinchi divizionda o'ynayman. U esa milliy terma jamoa safida o'ynaydi va haftasiga 150 ming funt sterling maosh oladi. U mendan million marta kuchli futbolchi ekanini bilaman, ammo men har hafta bajonudil unga qarshi o'ynagan bo'lardim va bir mavsumda 40ta gol urgan bo'lardim!», — deya yozgandi Tomas o'zining «Tvitter»dagi sahifasi orqali.

Kecha bo'lib o'tgan Angliya kubogining 1/32 final bosqichi doirasida bo'lib o'tgan o'yinda 35 yoshli futbolchi "shaharliklar" himoyachisi bilan to'p uchun kurashda ustun kelib, raqib darvozasini ishg'ol qildi.

«Kechirasiz, men barchaga javob yoza olmayman. Faqat shuni aytishim mumkinki, o'shanda men qattiq xato qilgan ekanman. Men bunday himoyachiga qarshi o'yinda bir mavsumda 40ta emas, 50ta gol uraman shekilli. Dam olish kuningiz yaxshi o'tsin», — deya yozdi «Port Veyl» hujumchisi bu safar.

«Men uchun eng yaxshi vaziyat mening golim emas, Benjamen Mendi meni kiyinish xonasi oldida kutib turgani bo'ldi. U men bilan selfiga tushib, «Manchester Siti»ning jamoaviy chatida e'lon qilmoqchi bo'lgan ekan", — deya yozdi Poup keyinroq.