Memfis Depay futbolchi sifatidagi so'nggi orzusi nima ekanligini aytdi

Niderlandiya terma jamoasi va Braziliyaning "Korintians" klubi forvardi Memfis Depay o'z intervyusida futbolchi sifatidagi so'nggi orzusi terma jamoa safida JCh-2026da g'alaba qozonish ekanligini tan oldi.

"Futbolchi sifatidagi so'nggi orzum? Jahon chempionatida g'olib bo'lish. 2014 yilda Braziliyada juda yaqin edik.

Men kelajakda ham yangi avlodni ilhomlantirishni istayman. Ularga maydonda ham, undan tashqarida ham o'zligini saqlab qolish muhimligini ko'rsatish. O'ziga ishongan bo'lish, o'zgalar fikriga e'tibor bermaslik, o'z xarakteriga ega bo'lish. Biz shunday mentalitetga ega bo'lgan futbolchilar bilan yangi davrga qadam qo'ymoqdamiz va men bunga o'zimcha kichik hissa qo'shganimga ishonaman," - dedi Depay.

Qo'shimcha qilamizki, Depay o'tgan yilning sentyabr oyida jamoaga kelib qo'shilganidan so'ng, "Korintians" safida barcha musobaqalarda 33 ta o'yinda maydonga tushib, 10 ta gol urgan va 12 ta golga hammualliflik qilgan.