Xayrulla Hamidovdan anons: «Asr avvali brendlari»

30 oktyabr. Futbol TV kanalidagi faoliyatimni "Manchester Yunayted" - "Arsenal" o'yini bilan boshladim. "Old Trafford" stadionida o'tgan edi bahs. Durang qayd etilgandi.

Bugun tunda 2020 yildagi ilk sharhim yana shu jamoalar o'yiniga oid. Bu safar uchrashuv "Emireyts"da.

Ikki oy ichida nimalar o'zgardi?

"Arsenal" ikki murabbiyi bilan xayrlashdi. Hozirda yangi mutaxassis boshchiligida yangi davrni boshdan kechirmoqda. Artetadan umid katta, deyishyapti.

Sulsher esa, o'sha paytdagi og'ir kunlardan eplab chiqib oldi.

Turnir jadvalidagi turli o'rinlar shundan. Biroq, uchrashuv payti o'zaro o'yinlar, turli statistika va jadvaldagi vaziyat bir chetga chiqib turadi.

Maydonga ingliz futbolining asr avvalidagi brendlari chiqib kelishadi. Darvoqe, XXI asrning dastlabki o'n yilligida Venger va Fergyuson boshchiligidagi klublar nafaqat Angliya, balki dunyo futboliga moda ulashardi. Ikkinchi o'n yillikda darajalari birmuncha tushdi.

Uchinchi o'n yillikni aynan "Arsenal" va MYu ochib berayotganida ham ramziy ma'no bordir balki. Ehtimol shu o'yindan so'ng ikki superklub asr avvalidagi  mavqeiga qaytib qolar. Balki.

O'yin vaqti juda kech demasangiz bo'lgani. Axir, London va Manchester yulduzlari bedor bo'lishingizga arzimaydimi?!

Birga kuzatamiz!