Otabek G'ulomxo'jaev «Navbahor»da ish boshladi

Xabaringiz bor, yakunlangan mavsumning 2-davrasidan boshlab, Namanganning “Navbahor” klubida o'sha paytda O'zbekiston U-19 yoshlar bosh murabbiyi sifatida faoliyat olib borayotgan yosh va mahoratli  mutaxassis Otabek G'ulomxo'jaev selektsioner murabbiy sifatida ish boshlagandi.

Ushbu mutaxassis borasida to'liqroq to'xtaladigan bo'lsak, Otabek G'ulomxo'jaev 1982 yilda Toshkent shahrida tug'ilgan.

O'z paytida futbolchi sifatida faoliyat yuritib, Toshkentning “Mirobod” (2-liga, 1999 yil), shuningdek, o'sha paytda O'zbekiston chempionatining oliy ligasida ishtirok etgan “Traktor” (Toshkent) klubining o'rinbosarlar (2000 yil), bundan tashqari, Andijonning “Andijon” (2001 - 2002 yillar) jamoalarida to'p surgan.

Afsuski, jiddiy jarohat sababli, G'ulomxo'jaev 2002 yili, ya'ni, ayni kuchga to'lgan, navqiron 20 yoshidayoq futbolchilik faoliyatini yakunlashga majbur bo'ldi.

Shundan so'ng, Otabek G'ulomxo'jaev murabbiylik faoliyaini boshlab, 2003 – 2007 yillar davomida “Paxtakor” futbol akademiyasi, 2008-2019 yillar mobaynida esa “Bunyodkor” futbol akademiyasida faoliyat olib bordi.

Shuningdek, G'ulomxo'jaev 2015-2016 yillarda O'zbekiston U-16 o'smirlar terma jamoasida bosh murabbiy Temur Olimxo'jaevga yordamchi sifatida faoliyat olib borib, Olimxo'jaev bilan birgalikda mazkur terma jamoani 2016 yili Hindistonning Goa shahrida bo'lib o'tgan U-16 terma jamoalari o'rtasidagi Osiyo chempionatiga olib borgan.

2018-2019 yillarda esa O'zbekiston U-19 yoshlar terma jamoasi bosh murabbiyi lavozimida ishlagan.

Otabek G'ulomxo'jaev yaqinda O'zbekiston U-19 yoshlar terma jamoasi bosh murabbiyligidan iste'foga chiqarildi va endi butun e'tiborini “Navbahor”ga qaratmoqda.

Buning samarasi o'laroq, yosh hamda kelajagi porloq mutaxassis jamoamizning selektsiya ishlarida ancha faol. Boisi, u “Paxtakor” va “Bunyodkor” klublarining futbol akademiyalari, shuningdek, O'zbekiston o'smirlar hamda yoshlar terma jamoalaridagi faoliyati davomida mamlakatimizning ko'plab iqtidorli va mahoratli futbolchilarini shug'ullantirgan hamda ularning imkoniyatlarini juda yaxshi biladi. Shu bois, Otabek G'ulomxo'jaev ayni paytda yurtimizdagi ko'plab yosh va mahoratli futbolchilar bilan muzokara olib bormoqda.

Aynan Otabek G'ulomxo'jaevning selektsiya borasidagi sa'y-harakatlari bilan “Navbahor”ning 2020 yilning 7 yanvaridan boshlanadigan o'quv-mashg'ulot yig'iniga O'zbekistonning 30 nafarga yaqin eng iqtidorli hamda mahoratli futbolchilari jalb etilishgan.

Ulardan qaysilari murabbiylar shtabida yaxshi taassurot qoldirsa, o'sha futbolchi bilan shartnoma imzolanadi.

O'z o'rnida ta'kidlash joizki, aynan Otabek G'ulomxo'jaevning faol harakatlari bois, jamoaning tarkibi yangi mavsumda ancha yosharishi ehtimoli yuqori.

“Navbahor” PFK matbuot xizmati.