Yaponiyalik dzyudo mutaxassisi ishtirokida mahorat darsi o'tkazildi

Bugun O'zbekiston dzyudo federatsiyasida yosh sportchilarimiz uchun yaponiyalik taniqli murabbiy, xalqaro yo'riqchi (instruktor) Tomu Tori ishtirokida mahorat darsi o'tkazildi. Ushbu tadbirda O'zbekiston Milliy olimpiya qo'mitasi vitse-prezidenti, O'zbekiston dzyudo federatsiyasi raisi Azizjon Kamilov, Milliy Paralimpiya assotsiatsiyasi raisi Muxtorxon Tashxodjaev, Italiya kurash (o'zbek kurashi) federatsiyasi prezidenti Vittorio Jorji, Yaponiya elchixonasining vakili Astushi Suda ham ishtirok etdi.

Mehmonlar tadbirni O'zbekiston dzyudo federatsiyasida qurib foydalanishga topshirilgan yangi zal bilan tanishishdan boshladilar. Shundan so'ng Tomi Tori dzyudo bo'yicha O'zbekiston yoshlar terma jamoasi vakillari va para-dzyudo jamoamiz a'zolari uchun mahorat darslarini o'tkazdi. Yaponcha texnik usullarga asoslangan mazkur master-klass dzyudochilarimizning mahorati yanada oshishi yo'lida as qotishi, shubhasiz. Tadbir yakunida qimmatli vaqtini ayamay mahorat darsini o'tkazgan Tomu Toriga esdalik sovg'alari taqdim etildi.