Ravshan Ermatov: «Qatardan o'rganadigan jihatlarimiz ko'p»

Avval xabar berganimizdek, Qatar futbol assotsiatsiyasining taklifiga binoan O'zbekiston futbol mutaxassislari guruhi Qatarda bo'lib turishibdi. Ushbu tashrif davomida vakillarimiz klublar o'rtasidagi Jahon chempionatining tashkiliy masalalari, bo'lajak 2022 yilgi Mundialga tayyorgarlik, yosh futbolchilar bilan ishlash tajribasi va yana qator yo'nalishlar borasida o'z tajribalarini oshirishmoqda.

O'FA Birinchi vitse-prezidenti Ravshan Ermatov ushbu safar borasidagi fikrlari bilan o'rtoqlashdi:

"Qatar ayni vaqtda Osiyoda futbol borasida eng jadal rivojlanayotgan mamlakatlardan biri. 10 yillar avval futbol kelajagi uchun tashlangan to'g'ri qadamlar sababli, bugungi kunda qatarliklar natijalarni yaxshilab olishdi. “Aspire” akademiyasiga 2006 yilda asos solindi. Ispaniya kabi futbol borasida etakchi mamlakatlardan bolalar va o'smirlar futboli mutaxassislari akademiyaga ishga taklif etildi. Mana, 2019 yilda Qatar Osiyo kubogi g'olibiga aylandi. Undan tashqari dunyoning eng nufuzli turnirlariga ham mezbonlik qilmoqda. Bunga erishish uchun esa Qatar eng zamonaviy va yuqori darajadagi futbol infratuzilmasini barpo etdi.

Shu sababli ham ishga professional yondoshuv, samaradorlikka erishish, tizimni to'g'ri yo'lga qo'yish borasida biz ushbu hamkorlarimizdan o'rgana oladigan tomonlarimiz ko'p.

Qatar futbol assotsiatsiyasi prezidenti Shayx Hamad bin Halifa bin Ahmad al-Tani bilan bo'lgan uchrashuvimizda ham biz o'zaro manfaatli aloqalarni yanada kuchaytirish borasida kelishib oldik. Ayniqsa terma jamoalar o'rtasidagi o'zaro bellashuvlar, murabbiylar tajribasini oshirish, malaka oshirish, bolalar va o'smirlar futboli hamda yana bir qator muhim yo'nalishlar bo'yicha Qatar bilan hamkorligimiz yanada kuchayadi".