Darvoqe, bilasizmi? Yanvar oyida yana bir marta «el-klasiko» tomosha qilishimiz mumkin

Kuni kecha bo'lib o'tgan "Barselona" va "Real" o'rtasidagi o'yin muxlislarga kutilgan shiddatni bera olmadi. Ko'pchilik bu uchrashuvga "zerikarli" o'yin deya ta'rif berdi. Lekin xafa bo'lishga o'rin yo'q, oradan 3 hafta o'tib biz yana bir "el-klasiko"ga guvoh bo'lishimiz mumkin.

Xabaringiz bor, Ispaniya superkubogi ilk marta o'zgacha formatda o'tkaziladi. Unda 4ta jamoa ishtirok etadi: Ispaniya chempioni ("Barselona"), Ispaniya kubogi g'olibi ("Valensiya"), La ligada 2-o'rin ("Atletiko") va 3-o'rin ("Real") sohiblari. Musobaqa 8-12 yanvar Saudiya Arabistonining Jidda shahrida o'tkaziladi.

Tashlangan qur'a natijasida yarim finalda quyidagi jamoalar to'qnash kelishadi:

"Valensiya" - "Real Madrid" (8 yanvar)
"Barselona" - "Atletiko" (9 yanvar)

"Qirollik klubi" va "ko'k-anorranglilar" yarim finalda g'alaba qozonishsa, 12 yanvar kuni bo'ladigan finalda bizni "klasiko" kutmoqda! Bu galgi to'qnashuv g'olib jamoaga sovrin taqdim etadi.

P.S. Bu safar "Real" finalga chiqadigan bo'lsa, raqibiga nisbatan 1 kun ko'proq dam olish imkoniyatiga ega bo'ladi.

P.S.-2. Ushbu haftada La liganing 18-tur o'yinlari o'tkaziladi va shundan so'ng musobaqa 2 haftaga ta'tilgan chiqadi. 3-5 yanvar kunlari chempionatining 19-tur o'yinlari o'tkazilgach, Ispaniya superkubogi uchun Primeroda yana 2 haftalik tanaffus yuzaga keladi.

P.S.-3. Ikkinchi davrada "Santyago Bernabeu"da o'tkaziladigan keyingi "el-klasiko" 1 mart kuniga belgilangan.