Diyor Imomxo'jaev Pro-ligada qatnashishga tayyor klublarga murojaat bilan chiqdi

2020 yilgi mavsumda Pro-ligada ishtirok etish istagini bildirib, bir qator klublardan murojaat tushmoqda. Yana kimda shunday reja bo'lsa, quyidagi fikrlar bilan tanishib chiqishini istardim.

Biz 2019 yilgi mavsum so'ngida pulkani qayta tikladik. Unda sport printsiplariga to'liq amal qilinib, faqatgina o'z mintaqasida g'olib chiqqanlarnigina poytaxtda to'pladik. Yakunda Namanganning Paxtakor-79 klubi g'oliblikni qo'lga kiritdi. Demak, kimdir Pro-ligada o'ynamoqchi bo'lsa, 2020 yil o'z viloyatining 2-ligasida o'ynaydi, uni yutsagina, yil so'ngida pulkada ishtirok etadi. Boshqachasiga biz pulkada ishtirok etgan barcha klublarga nisbatan nohaqlik qilgan bo'lamiz.

Shuningdek, ko'plab klublar hokim barcha sharoitlarni qilib berishi haqida aytishyapti. Birinchidan, tuman hokimi barcha sharoitlarni qilib bera olmaydi. Futbolimiz tarixi bunday va'dalarning ko'pini ko'rgan. Ikkinchidan, hokimlar qishloqlarda svet, gaz bo'lishini, tibbiy xizmat, ta'lim sohasida o'sishlar bo'lishini va hokazolarni o'ylagani to'g'riroq. O'FA va O'zPFL bundan buyog'iga xususiy futbol klublarini qo'llab-quvvatlaydi, o'z reglamentlarida xususiy futbol klublari uchun engilliklar yaratadi. Va albatta bosqichma-bosqich katta klublar ham o'z yo'nalishlarini o'zgartirishlariga to'g'ri keladi.

Xulosa: Pro-ligada o'ynamoqchimisan, O'FA yoki O'zPFL rahbariyatining eshigi ostida turma, o'rtaga odam solma, telefonlarini tinch qo'y. Zo'r bo'lsang, o'zingni maydonda ko'rsat, futbol o'yna, 2-ligani yut, pulkani yut, umuman, hammani yut. Eng to'g'ri yo'li shu. Tugadi.

Diyor Imomxo'jaev