Ronaldu agenti: «Oltin to'p»ni Messi olgani — adolatsizlik»

«Yuventus» hujumchisi Krishtianu Ronalduning agenti Jorje Mendesh «Barselona» forvardi Lionel Messi 2019 yilda «Oltin to'p»ga munosib emas, deb hisoblaydi.

«Ronaldu – jahonning eng yaxshi futbolchisi. Ungacha Portugaliya terma jamoasi hech narsa yutmagan edi, u bilan esa Evropa chempioni bo'ldi, Millatlar ligasida g'olib chiqdi. U jahon futbolini o'zgartirdi. Avvallari Portugaliya haqida gap ketganda, hamma kichik mamlakatni ko'z oldiga keltirar edi. O'ylashimcha, Ronaldu kelasi yilda terma jamoadagi gollari sonini 110taga etkazib, jahon rekordini o'rnatadi. Ishonchim komil, u oltinchi «Oltinchi to'p»ni qo'lga kiritadi.

Bu yilda Messi sovrinni nohaq qo'lga kiritdi. Ronaldu Millatlar ligasida g'olib chiqqan edi. Lekin hayot shunday. Agar u "Real"da o'ynayotganida, sovrinni yutgan bo'lardi. Ronaldu – chempion, u 2020 yilda g'oliblikni qo'lga kiritish uchun nima qilish kerakligini yaxshi biladi», – dedi Mendesh.

Eslatib o'tamiz, "Oltin to'p" uchun o'tkazilgan so'rovnomada Messi «Liverpul» himoyachisi Virjil van Deykni 7 ballga ortda qoldirdi. Ronaldu esa uchinchi o'rinni egalladi.