Davron Fayziev Qatar safari bilan o'rtoqlashdi

O'zbekiston futbol assotsiatsiyasi ishchi guruhi ayni paytda Qatarda bo'lib turibdi. Mutaxassislarimiz Qatarning yirik musobaqalarni o'tkazish borasidagi tajribasini o'rganishmoqda. Guruh safida O'FA media departamenti boshlig'i Davron Fayziev ham bor. U telegramdagi kanali orqali o'z taassurotlari bilan o'rtoqlashdi.

"Ayni vaqtda Qatarda bo'lib turibman. Klublar o'rtasidagi Jahon chempionati doirasida katta turnirlar o'tkazish bo'yicha seminar bo'lyapti. 40 qavatli Qatar futboli uchun ajratilgan binoga bordik. Tafsilotlar bilan sizni qiynamayman. Taassurot xolos. 2022 yilgi Jahon chempionati futuristik ko'rinishda namoyon bo'ladi. Ishoning, Qatar tayyorgarlikni “yorvoryapti”. Balki shunchaki prezentatsiya vahimalikdir, lekin ishlarning deyarli yarmi qilib bo'lingan. Milliardlar sarflanyapti. Metro quriladi mundialgacha. Havo mana hozir ideal ko'rinishda futbol o'ynash uchun. Qishda o'tkazish qarori to'g'ri bo'lgan. Yulduzlar ham mavsum oxirida suvi siqilgan limondek ahvoldamas, mavsum o'rtasida formaning cho'qqisida borishadi.

Bitta kamchilik shuki, klublar o'rtasidagi jahon chempionatiga ham Dohaning o'zida qiziqish u qadar yuqorimas. Bo'lmasam so'nggi yuksak natijalardan kelib chiqsak Qatarda futbolga muxlislik bo'yicha “bum” bo'lishi kerak edi. Terma jamoa Osiyo chempioni! Bugungi kunda ahvol shunday, balki mundialgacha o'zgarar. Butun dunyodan keladigan muxlislarning o'zi atmosfera ta'minlab berishadi. Millionlab turistlar oqimini kichik mamlakat qanday sig'dirarkin. Tashkilotchilikni eplashyapti. To'g'riyamda, har bir pozitsiyada FIFAdan, yoki futboli rivojlangan mamlakatlardan etuk professionallar ishni boshqarib turishibdi. Bugun, shuningdek, "Esparansa" - "Al-Hilol" o'yiniga tushdik. Afrika va Osiyo chempionlari to'qnashuvi. "Hilol" yutdi qiynalib. Bu alohida mavzu, keyinroq yozaman".