La liga. «Barselona» «el-klasiko» oldidan ochko yo'qotdi (videosharh)

Ispaniya chempionatining 17-turi doirasida bo'lib o'tgan «Real Sosedad» va «Barselona» o'rtasidagi o'yinda jangovar durang qayd etildi.

Uchrashuvning 11-daqiqasida mezbonlar burchak zarbasini amalga oshirgan paytda Buskets o'z jarima maydoni ichida raqib futbolchisini tortib qolgani uchun hakam "Barselona" darvozasi tomon penalti belgiladi. Mikel Oyarsabal 11 metrli jarima zarbasidan unumli foydalanib, hisobni ochdi.

Ushbu goldan keyin ustunlik to'laligicha san-sebastyanliklar tomonida bo'ldi. Bo'lim tugashiga 7 daqiqa qolganida kataloniyaliklar qarshi hujum tashkil qilib, o'zlarining ilk imkoniyatidayoq raqib darvozasini ishg'ol qilishdi. Suaresning uzatmasidan keyin Grizmann yakkama-yakka vaziyatga chiqib borib, "parashyut" uslubida to'pni darvozabonning ustidan oshirib qo'ydi.

"Ko'k-anorranglilar" ikkinchi bo'limni ancha faol boshlab, tezda oldinga o'tib olishdi. Maydon markazida turgan Buskets ajoyib uzatma bilan Messini darvozabon bilan yakkama-yakka vaziyatga chiqib ketdi. Argentinalik futbolchi to'pni qizg'anmadi va yanada qulay vaziyatda turgan sherigiga uzatma berdi. Luis Suares bo'sh darvozani zabt etdi.

Valverde shogirdlari o'yinni nazorat qilishayotgan edi, toki darvozabon qo'pol xatoga yo'l qo'ymaguncha. Nacho Monreal tomonidan chap qanotdan etkazilgan u qadar kuchli bo'lmagan to'pni Mark-Andre Ter Shtegen shundoqqina oldida turgan Isakka qaytardi. Aleksander yaqin masofadan darvozani ishg'ol qildi.

Shundan keyin ustunlik yana "Sosedad" tomoniga o'tgan bo'lsa, "Barselona" so'nggi daqiqalarda g'alabani ilib ketishga harakat qildi. Ammo yakuniy hisob — 2:2.

Shu tariqa, "Barsa" 18 dekabr kuni "Real"ga qarshi bo'ladigan o'yin oldidan 2 ochko yo'qotdi. "Real" esa "Valensiya"ga qarshi o'yinda g'alaba qozonsa, jadvalda 1-o'ringa ko'tarilib oladi.

Ispaniya La ligasi, 17-tur
Real Sosedad – Barselona 2:2 (1:1, 1:1)
Gollar: 1:0 – 12, penalti Oyarsabal, 1:1 – 38 Grizmann, 1:2 – 49 Suares, 2:2 – 62 Isak.
Real Sosedad – Remiro, Lorente, Saldua, Monreal, Gevara, Merino, Edegor, Oyarsabal (Barrenechea, 85), Subeldiya, Portu (Yanuzay, 59), Isak (Villian Joze, 66).
Barselona – ter Stegen, Langle, Serji Roberto, Alba (Semedu, 74), Pike, Buskets (Alenya, 73), de Yong, Rakitich (Vidal, 79), Messi, Suares, Grizmann.
Ogohlantirish: Suares (74).