Nagoya shahri delegatsiyasi O'zbekiston futbol assotsiatsiyasida bo'ldi

Ayni kunlarda Yaponiyaning Nagoya shahri delegatsiyasi yurtimizda bo'lib turibdi.

Ikki mamlakat o'rtasidagi aloqalarni yanada mustahkamlash borasida qator uchrashuv va tadbirlar bo'lib o'tmoqda.

Bugun O'zbekiston futbol assotsiatsiyasida Nagoya shahri delegatsiyasi vakillari bilan uchrashuv o'tkazildi. Unda O'zbekiston va Yaponiya mamlakatlarining futbol sohasida ham yaqindan hamkorlik aloqalarini yanada yaxshilash, bolalar futboli, futzal, ayollar futboli bo'yicha birgalikda loyiha va dasturlar amalga oshirish, turli yosh toifalari o'rtasida musobaqalar tashkil etish, futbolning turli yo'nalishlari bo'yicha o'zaro tajriba almashish, o'zbekistonlik mutaxassislarning Yaponiyaga malaka oshirish uchun borishlari kabi masalalar muhokama etildi.

Ikkitomonlama hamkorlikni yanada mustahkamlashda O'FA Birinchi vitse-prezidenti Ravshan Ermatov mutaxassislarimizning ish salohiyatini oshirish uchun yapon tajribasini o'rganish muhim ekanini aytib o'tdi:

- Hakamlik faoliyatim davomida Yaponiyada ko'p marotaba bo'lganman. Yapon mutaxassislarining o'z kasbiga bo'lgan munosabati, ularning o'z ishga puxta yondashishi, tashkiliy masalalarda juda ham professional ekanliklari taqsinga loyiq, aynan shuning uchun ham Yaponiya futboli bugungi kunda shunday yuqori saviyaga chiqdi. O'zaro hamkorligimiz doirasida o'zbekistonlik futbol mutaxassislarini Yaponiyaga malaka oshirish uchun yuborib, yapon tajribasini o'rganishga harakat qilamiz. O'zaro hamkorlik kelajakda ikki tomon uchun ham foydali bo'lishiga ishonamiz, - deya ta'kidladi O'FA birinchi vitse-prezidenti.

O'z navbatida yaponiyalik mutaxassislar mehmondo'stlik va iliq munosabatdan mamnun ekanliklarini bildirib, aloqalarni yanada mustahkamlashga tayyor ekanliklarini, bu borada endilikda izchil ravishda ish olib borilishini ta'kidlashdi.