«Sog'lom avlod» stadionida qanday o'zgarishlar ro'y beradi?

Avval xabar berganimizdek, kecha Andijon shahridagi “Sog'lom avlod” stadionida Viloyat hokimi Shuhratbek Abdurahmonov yig'ilish o'tkazib, yangi mavsumga stadionni PFL talablariga muvofiq tarzda tayyorlash bo'yicha mas'ul shaxslarga topshiriq bergandi.

Bugundan rasman maydon ustalari ishni boshlab yubordi. Maydonni butunlay qaytadan tayyorlashga astoydil bel bog'lagan, mahalliy mutaxassis Qobiljon Rahmonovning aytishicha, nasib qilsa “Sog'lom avlod” stadionining maydoni mart oyiga borib foydalanishga topishiriladi.

Stadionda maydonni qayta tayyorlashdan tashqari, yana bir qancha e'tiborga molik o'zgarishlar qilinadigan bo'ldi. Bu esa har qanday muxlisni quvontirmasdan qolmaydi albatta.

Viloyat hokimi Shuhratbek Abdurahmonov yig'ilishda stadiondagi “projektor”larga ham e'tibor qaratib, yoritkichlar qaytadan qilinishi kerakligini bildirdi.

Yoritkich PFL talabiga binoan eng kamida 1200 lyuks bo'lishi shart. Shu bois viloyat elektr tarmoqlari rahbariga shaxsan viloyat hokimining o'zi topshiriq berib, yoritkichlar talab darajasida bo'lishi kerakligini a'lohida ta'kidlab o'tdi.

Shuningdek uchrashuv chog'ida hisobni aks ettirib turuvchi yangi zamonaviy elektron tablo ham qo'yiladigan bo'ldi. Ushbu elektron tablo ham kompyuterda boshqarib boriladi va o'yindan avval “Andijon” jamoasi tarkibida xarakat qiladigan futbolchilarni rasmlari bilan tanishtirib boriladi.

Bundan tashqari 1 sektorda litsenziyalash talablaridan kelib chiqib, CIP loja tashkil etiladi va u erdagi o'rindiqlar boshqa sektorlarnikidan farq qiladi. Tribunaning qolgan sektorlari 18000 dona o'rindiq bilan butunlay yangilanadigan bo'ldi.

O'rindiqlar hozirgidek har xil rangda emas balki, ikki xil rangda bo'ladi. Ya'ni oq va ko'k.

Stadiondagi reklama shitlari ham kompyuterlashtirilib, jamoa xomiylarining nomi uchrashuv paytida reklama qilinib boriladi.

Yana bir muhim yangilik – “Sog'lom avlod” stadionida ommaviy axborot vositalari xodimlari uchun alohida joy ajratiladigan bo'ldi. Rejaga ko'ra hozircha eng kamida 30ta jurnalist uchrashuv paytida bir vaqtning o'zida media-tribunada qulay va sifatli internet tizimi orqali bemalol ishlay oladigan sharoit yaratiladi.

“Sog'lom avlod”dagi bu kabi eng muhim ishlar amalga oshirilgach, shubhasiz stadionimiz yanada chiroyli ko'rinishga kelishi turgan gap.