Bokuda Markaziy Osiyo futbol assotsiatsiyalari uchun FIFA loyihalarini amalga oshirish bo'yicha seminar o'tkazildi
/ Kiritdi: BestMaster Ko'rilgan: 362
Ozarbayjon poytaxti Boku shahrida Markaziy Osiyo futbol assotsiatsiyalari uchun FIFA loyihalarini amalga tatbiq etish, loyihalarning yanada samaradorligini oshirish mavzusida amaliy seminar bo'lib o'tdi.
11-12 dekabr kunlari O'zbekiston, Qirg'iziston, Tojikiston hamda Turkmaniston futbol assotsiatsiyalari vakillari Bokuda yig'ildilar. Ikki kunlik FIFA seminari mobaynida jahon futbol uyushmasi tashabbusi bilan o'tkaziladigan turli loyiha va dasturlar ko'lami, ularni amalga oshirishda maksimal samaradorlikka erishish, uzoq muddatga mo'ljallangan puxta rejali loyihalar orqali mamlakatda futbolni yanada rivojlantirishga, uning ommaviyligini oshirishga, shuningdek, infratuzilmani yaxshilashga erishish kabi masalalar muhokama etildi.
Mazkur seminarda O'FA Birinchi vitse-prezidenti Ravshan Ermatov ham ishtirok etdi va O'zbekiston futbol assotsiatsiyasining yurtimizda futbolni yanada rivojlantirishga qaratilgan loyihalari xususida ma'lumot berdi.
Seminar davomida FIFAning turli yo'nalishdagi loyiha va dasturlarini maqsadli amalga oshirishda Ozarbayjon tajribasi ham o'rganildi.