Karpin Shomurodovning gol urishiga nima xalal berganini aytdi

«Rostov» hujumchisi Eldor Shomurodov 28 dekabr kuni uylanmoqda. Jamoa bosh murabbiyi Valeriy Karpinning aytishicha, futbolchining so'nggi o'yinlarda gol ura olmaganiga shu narsa sabab bo'lgan.

«Futbolchiga ta'sir ko'rsatadigan maydondan tashqaridagi narsalar ham bor. Masalan, o'yin boshlanishidan 2 soat oldin Kral («Spartak» o'yinchisi)ning farzandi dunyoga kelgani uchun u maydonda o'yin haqida emas, bolasi haqida o'yladi. Axir futbolni insonlar o'ynaydi. Ittifoq paytida: «Uylanding — bir yilga yo'qolding», degan gap bo'lardi», — dedi Karpin.

Karpinning ta'kidlashicha, u Eldor Shomurodov tanlagan qizni tanimaydi. Futbolchi u bilan 2 oy avval tanishgan.

Ma'lumot o'rnida. Shomurodov Rossiya chempionatining birinchi qismida 10ta gol urdi va 6ta golga uzatma berdi.