Konte: «Barselona» bilan o'yinda pley-offga chiqish uchun so'nggi imkoniyatga egamiz»

"Inter" bosh murabbiyi Antonio Konte Evropa chempionlar ligasining 6-turi doirasida "Barselona"ga qarshi o'yin oldidan o'z fikrini bildirib o'tdi.

Eslatib o'tamiz, "neradzurri" mazkur o'yinda g'alaba qozonsagina pley-offga chiqadi.

"Muhim o'yin kutib turibdi. Biz pley-off yo'llanmasi uchun kurash olib boramiz. "Barselona" bilan o'ynayotganimizdan faxrlanaman. Oson guruh emasligini bilardik. Biz kurashni davom ettirishni istaymiz. "Barselona" musobaqa boshidanoq favoritlar safida tilga olinadigan 4-5ta jamoalardan biri hisoblanadi. Vaziyatni o'nglash uchun bizda so'nggi imkoniyat mavjud", - dedi Konte.

Eslatib o'tamiz, "ko'k-anorranglilar" 11 ochko bilan keyingi bosqich masalasini muddatidan avval hal qilib bo'lgan. "Inter" va "Borussiya" hisobida esa 7 ochko mavjud.

"Inter" - "Barselona" o'yini 10 dekabrdan 11 dekabrga o'tar kechasi Ttoshkent vaqti bilan 01:00da boshlanadi.