Shaxmat, rapid bo'yicha JCh. Abdusattorov va Sindarov ikkinchi kundan so'ng top-10ga kirishdi, Hamdamova esa 15-o'rinda bormoqda

AQShning Nyu-York shahrida shaxmatning rapid yo'nalishida Jahon chempionati davom etmoqda. Bugun sportchilar navbatdagi 4 ta tur bahslarini o'tkazishdi.

Musobaqada O'zbekistondan 6 nafar shaxmatchi ishtirok etayotgani haqida xabar berib o'tgandik. Nodirbek Abdusattorov va Javohir Sindarov bugungi 4 ta o'yinda 2,5 tadan ochko to'plashdi. Natijada ularning ochkolari 6,5 taga etdi. Hamyurtlarimiz peshqadamlardan 0,5 ochko ortda qolgan holda mos ravishda 7 va 9-pog'onalarni egallab turishibdi.

Jahongir Vohidov esa 5,5 ochko bilan 37-o'rinni band etgan bo'lsa, Shamsiddin Vohidov va Muhiddin Madaminov 4 ochko bilan 120 va 125-o'rinlarda borishmoqda.

Musobaqa favoriti Magnus Karlsen esa 8 turdan 5 ochko to'plagandi. U 9-turdan boshlab bahslarda ishtirok etmaslikka qaror qildi.

Bugun tunda yana 4 ta tur o'yinlari o'tkaziladi. 10-turda Sindarov rossiyalik Yan Nepomnyashchiyga qarshi oq donalarda o'ynasa, Abdusattorov ham rossiyalik Denis Lazavik bilan oq donalarda harakat qiladi.

Ayollar musobaqasida ishtirok etayotgan Afruza Hamdamova yaxshi natijalarni qo'lga kiritishda davom etmoqda. Hamyurtimiz bugun o'tkazilgan navbatdagi 4 ta o'yinda 2,5 ochko to'pladi. Natijada Afruza 5,5 ochko bilan musobaqa jadvalida 15-o'rinni band etib turibdi.

Bugun tunda erkaklar 4 ta, ayollar esa 3 ta tur bahslarini o'tkazishadi va rapid musobaqasi yakun yasashadi.