Andrey Shipilov: «Ketma-ket ikki mavsumdan beri 5-o'rinni egallayotganimiz to'g'ri yo'lda ekanimizni ko'rsatadi»

“Metallurg” – “Surxon” (2:0) jamoalari uchrashuvidan so'ng mezbonlar jamoasi ustozi Andrey Shipilov o'yin haqidagi fikrlarini bildirib o'tdi.

"Oldingi musohabalar davomida ham bir necha bor ta'kidlab o'tganman, xalqimizda bir naql bor: "jo'jani kuzda sanaydi", degan. Futbolga yo'naltirsak, ochkolarni kuzda sanaymiz. Ajoyib o'yin bo'ldi. Kech kuz bo'lishiga qaramasdan maydonning holati qoniqarli. Kuchli shamol o'yin sifatiga biroz ta'sirini ko'rsatdi. Birinchi taym u bizning foydamizga xizmat qildi. Raqiblar darvozasini ikki marta ishg'ol etdik. Har ikkala golni betakror bo'ldi, deyish mumkin. Butun taym davomida raqibga boshni ko'tarish imkoniyatini bermadik. To'p uchun barcha yakkakurashlarda, ta'qibda g'olib chiqdik. Yigitlar ruhan juda ko'tarinki kayfiyatda to'p surishdi. Barcha jabhalar bo'yicha raqibdan ustunlik qildik.

Ikkinchi taymda esa ratsional kuch sarflab, hisobni saqlab qolishga o'ynadik. Bundan tashqari bu taymda shamolning yo'nalishiga qarshi to'p surish oson bo'lmadi. Eng asosiysi yigitlar berilgan ko'rsatmalarni bekamu ko'st ado etishdi. So'nggi uchta turda biz o'z darvozamiz dahlsizligini saqlab qololdik. Raqib darvozasiga esa ettita to'p kiritdik. O'ylaymanki, bu yomon ko'rsatkich emas. Yigitlardan ta'tilga ko'tarinki kayfiyatda chiqib ketishlarini so'ragandim, ular esa ko'rsatmalarni aniq bajarishdi, bundan xursandman.

Ketma-ket ikki mavsumdan buyon chempionatni beshinchi o'rinda yakunlayapmiz. Bu yil jamoalar soni ikkitaga oshgan bo'lsa-da, o'tgan yilgi mavqeimizni saqlab qoldik. Bu esa bizning to'g'ri yo'ldan harakatlanayotganligimizni isbotlaydi. Hamisha yutuqlar bor joyda kamchiliklar ham bo'ladi. Biz ularni takrorlamay, bataraf etib boramiz. Imkon darajasida har mavsum ko'rsatkichlarimizni yaxshilab, bir, ikki pog'ona yuqorilashda davom etamiz", - dedi Andrey Sergeevich.