Boks. Tokio-2020da hakamlarning baholari har bir raunddan so'ng e'lon qilib boriladi

Boks yurtimizda eng sevimli sport turlaridan biri ekani sir emas. Barchamiz hamyurtlarimiz ishtirokidagi janglarni katta hayajon bilan kuzatib boramiz. Ayniqsa, har bir raund yakuniga etgach hakamlarning bokschilarga qanday ochko berganini hamma katta hayajon bilan bilishni istaydi.

Xalqaro Olimpiya qo'mitasining boks bahslarini o'tkazish va nazorat qilib borish uchun tuzgan komissiyasi yangi qaror qabul qildi. Unga ko'ra, Tokio Olimpiadasining saralash bahslari va Olimpiya o'yinlarida o'tkaziladigan janglarda hakamlarning bokschilar uchun bergan ochkolari har bir raund yakunida e'lon qilib boriladi. Bu holatga Rio Olimpiadasi vaqtida ham guvoh bo'lgan edik.  

Morinari Vatanabe boshchilik qilayotgan maxsus komissiya ochkolarning bunday e'lon qilinishiga baholanish mezonining shaffof va adolatli bo'lishi kerakligi bilan izoh bermoqda. XOQning ma'lum qilishicha, bunday qaror sportchilar bilan o'tkazilgan konsultatsiyadan so'ng qabul qilingan. Yana bir e'tiborli jihati shundaki, maxsus komissiyaning qaroriga ko'ra, Rio Olimpiadasining boks bahslarida ishlagan referilar yangi Olimpiya o'yinlari saralash musobaqalari va Tokio-2020da faoliyat olib bora olmaydi, deb xabar bermoqda MOQ matbuot xizmati.

Eslatib o'tamiz, Osiyo qit'asi va jahon miqyosida Olimpiya o'yinlariga yo'llanma beruvchi boks turnirlari kelasi yilning 3-14 fevral kunlari Xitoyning Uxan, 13-24 may kunlari esa Frantsiyaning Parij shaharlarida o'tkaziladi.

O'zbekiston boks federatsiyasi matbuot xizmati