Superliga va Pro-liga klublari bosh murabbiy va rahbarlari uchun kelishilgan o'yinlarga qarshi kurash bo'yicha seminar o'tkazildi

Joriy yilning iyul oyida Osiyo futbol konfederatsiyasi bosh qarorgohida bo'lgan Ravshan Ermatov boshchiligidagi O'FA delegatsiyasi OFKning kelishilgan o'yinlarga qarshi kurash olib borish masalasi bo'yicha mas'ullari – AFC Integrity departamenti rahbari Ahmed Alosaymi, shuningdek, Sportradar kompaniyasi direktori Oskar Brodkin bilan uchrashuv o'tkazgan edi.

Uchrashuv chog'ida OFK vakillari O'zbekistondagi ichki musobaqalarda kelishilgan o'yinlar tashkil etilishiga qarshi kurashda O'zbekiston futbol assotsiatsiyasini to'liq qo'llab-quvvatlashini hamda bu borada o'zaro hamkorlikda ish olib borishga tayyor ekanini ma'lum qilishgan edi. O'z navbatida Ravshan Ermatov ham mamlakatimizda futbolning rivoji uchun to'sqinlik qilayotgan turli qing'irliklardan holi bo'lish muhim ekani, kelishilgan o'yinlarga qarshi kurashda O'FAning qit'a futbol konfederatsiyasi bilan hamjihatlikda faoliyat olib borishi yanada samara berishini ta'kidlagan edi.

Shu maqsadda kuni kecha AFC Integrity vakillari yurtimizga tashrif buyurib, Superliga va Pro-liga klublari bosh murabbiy va rahbarlari uchun maxsus seminar tashkil etishdi. Seminar davomida kelishilgan o'yinlar tashkil etilishining oldini olish, o'yin natijasiga ta'sir ko'rsatilishiga qaratilgan har qanday xatti-harakatga qarshi kurashish bo'yicha zarur tavsiya va ko'rsatmalar taqdim etildi.