O'zbekistonga OFK kubogi uchun 1ta o'rin taqdim etilishi mumkin

2021 yilgi mavsumdan boshlab O'zbekiston klublari OFK kubogi musobaqasiga qaytishi mumkin. Bu haqda Alisher Nikimbaev o'zining telegramdagi kanali orqali xabar tarqatdi.

OFK Ijroqo'mi oktyabr oyida qabul qilgan qarorga ko'ra, 2021 yilgi mavsumdan boshlab Osiyo chempionlar ligasi guruh bosqichidagi jamoalar soni 32tadan 40taga oshiriladi. Ammo Sharq va G'arb mintaqalaridagi OFK reytingida dastlabki 6ta o'rinni band etgan mamlakatlarning kvotalari o'zgarmaydi. Shu bois, O'zbekiston uchun OChLdagi kvotasi "1+1" ko'rinishida qoladi. Jamoalar soni reytingda 7-10-o'rinni egallagan mamlakatlarga beriladigan bitta o'rinlar evaziga oshiriladi.

OFK ko'rib chiqayotgan loyihaga ko'ra, esa reytingda dastlabki 6ta pog'onani band etgan mamlakatlar uchun OFK kubogi guruh bosqichi uchun qo'shimcha bittadan o'rin ajratish rejalashtirilmoqda. OFK musobaqalarni o'tkazish qo'mitasi ushbu loyihani 5 kundan keyin ko'rib chiqadi.

Demak, ushbu tasdiqlansa, 2021 va 2022 yilgi mavsumlarda O'zbekistonning 3 klubi qit'a miqyosida musobaqada ishtirok etadi: Osiyo chempionlar ligasida — 2ta (1+1) va OFK kubogida — 1ta.